បរទេស ៖ យោងតាមការចេញផ្សាយរបស់ RT អ៊ីស្រាអែល កំពុងពិចារណាបង្កើត កងកម្លាំងយោធាពហុជាតិ នៅក្នុងតំបន់ហ្គាហ្សា ដើម្បីទទួលបន្ទុក សន្តិសុខ ក្នុងតំបន់នេះបើ យោងតាមរបាយការណ៍ ហើយគំនិតនេះ បានមកពីរដ្ឋមន្ត្រីការពារជាតិ អ៊ីស្រាអែល Yoav Gallant ដែលបានបញ្ចេញ វាក្នុងអំឡុងពេលដំណើរទស្សនកិច្ច របស់គាត់ទៅកាន់ទីក្រុងវ៉ាស៊ីនតោន កាលពីដើមសប្តាហ៍នេះ ។
លោកGallant ត្រូវបានគេរាយការណ៍ថា បានស្នើសុំឱ្យទីក្រុងវ៉ាស៊ីនតោន គាំទ្រគំនិតផ្តួចផ្តើមក្នុងអំឡុងពេលកិច្ចប្រជុំ របស់គាត់ជាមួយរដ្ឋមន្ត្រីការពារជាតិ សហរដ្ឋអាមេរិក Lloyd Austin រដ្ឋមន្ត្រីការបរទេស Antony Blinken និងទីប្រឹក្សាសន្តិសុខជាតិ Jake Sullivan ទន្ទឹមនឹងនេះដែរ មន្ត្រីអ៊ីស្រាអែលក៏ត្រូវបានគេរាយការណ៍ថា បាននឹងកំពុងពិភាក្សា លើសំណើនេះ ក្នុងប៉ុន្មានសប្តាហ៍ថ្មីៗនេះ ជាមួយនឹងតំណាងមកពីប្រទេសអារ៉ាប់ យ៉ាងតិចចំនួនបី ដែលមួយក្នុងចំណោម នោះគឺជាប្រទេសអេហ្ស៊ីប ។
ទោះបីជាយ៉ាងណាក៏ដោយ មន្ត្រីអារ៉ាប់ ដែលមិនបញ្ចេញឈ្មោះម្នាក់ មកពីប្រទេសមួយដែលត្រូវបានរាយការណ៍ថា បានចូលរួមនៅក្នុងកិច្ចពិភាក្សានេះ បាននិយាយថា វាមិនទំនងដែលថា ទាហានបរទេសនឹង ត្រូវដាក់ពង្រាយទៅកាន់តំបន់ រហូតដល់អរិភាព បញ្ចប់នោះទេ។
គួរឲ្យដឹងដែរថាមន្ត្រីអាមេរិកម្នាក់ បានបន្ថែមថា វិធានការនេះនឹងតម្រូវឱ្យមានការអញ្ជើញជាផ្លូវការ ពីអាជ្ញាធរប៉ាឡេស្ទីននៅតំបន់ហ្គាហ្សា ហើយនឹងមកតែក្នុងបរិបទ នៃដំណោះស្រាយរដ្ឋពីរប៉ុណ្ណោះហើយ ប្រភពបានកត់សម្គាល់ថា នេះជាការធ្វើឱ្យគំនិតផ្តួចផ្តើមនេះទំនងជាមិនអាចកើតមានក្នុងរយៈពេលដ៏ខ្លីខាងមុខដោយសារការប្រឆាំងរបស់អ៊ីស្រាអែល ក្នុងការទទួលស្គាល់ប៉ាឡេស្ទីន ជារដ្ឋដាច់ដោយឡែក ៕
ប្រែសម្រួល៖ស៊ុនលី
