បរទេស៖ យោងតាមការចេញផ្សាយរបស់ RT ការវាយប្រហារដោយយន្តហោះគ្មានមនុស្សបើក របស់យោធាអ៊ុយក្រែននៅជិតទីក្រុង Elabuga របស់រុស្ស៊ីកាលពីថ្ងៃអង្គារ បានធ្វើឱ្យសិស្សមកពីបរទេសចំនួន ប្រាំបីនាក់រងរបួសហើយ
អ្នកដែលរងគ្រោះដោយការ វាយប្រហារទាំងអស់កំពុងសិក្សា នៅមហាវិទ្យាល័យបច្ចេកទេស នេះបើយោងតាមអាជ្ញាធរសុខាភិបាលក្នុងតំបន់។
សេវាសារព័ត៌មានរបស់ប្រធានាធិបតីនៃតំបន់ Tatarstan បានបញ្ជាក់ប្រាប់សារព័ត៌មានរុស្ស៊ី ជាច្រើនកាលពីថ្ងៃពុធថា អន្តេវាសិកដ្ឋានមហាវិទ្យាល័យនៅ Alabuga Polytech ក្នុងតំបន់សេដ្ឋកិច្ចពិសេសរបស់ទីក្រុង ត្រូវបានវាយប្រហារដោយ ដ្រូនរបស់កងម្លាំងអ៊ុយក្រែន។
ការវាយប្រហារនេះបានធ្វើឱ្យ មនុស្សសរុប១៤នាក់ រងរបួសដោយក្នុងនោះមានពលរដ្ឋនៃប្រទេសរុស្ស៊ី កៀហ្ស៊ីស៊ីស្ថាន ស្រីលង្កា ហ្ស៊ីមបាវ៉េ រវ៉ាន់ដា កុងហ្គោ កេនយ៉ា នីហ្សេរីយ៉ា និងស៊ូដង់ខាងត្បូងផងដែរដែល ស្ថិតក្នុងចំណោមពួកគេ។ ដោយឡែកមនុស្សប្រាំមួយនាក់កំពុងសម្រាកព្យាបាល នៅមន្ទីរពេទ្យដោយមានរបួសមិនគំរាមកំហែង អាយុជីវិតហើយនៅសល់ត្រូវបានអនុញ្ញាតិឲ្យ ត្រឡប់ទៅកន្លែងស្នាក់នៅវិញ។
គួរឲ្យដឹងដែរថាតំបន់សេដ្ឋកិច្ចពិសេស Alabuga ដែលស្ថិតនៅចម្ងាយប្រហែល ១០គីឡូម៉ែត្រពីទីក្រុង Elabuga ផ្តល់លក្ខខណ្ឌពិសេសសម្រាប់អាជីវកម្ម ដូចជាការលើកលែងពន្ធ និងជាសង្កាត់មួយក្នុងចំណោម ស្រុកចាស់ជាងគេនៅក្នុងប្រទេសរុស្ស៊ីហើយ វាក៏ជាមជ្ឈមណ្ឌលផលិត រថយន្តដ៏ធំមួយផងដែរ៕
ប្រែសម្រួល៖ ស៊ុន លី