យេរ៉ូសាឡឹម៖ អ៊ីស្រាអែលបានបន្តរៀបចំខ្លួននៅថ្ងៃសុក្រ សម្រាប់ការសងសឹកដ៏មានសក្តានុពល បន្ទាប់ពីការវាយប្រហារលើអគារស្ថានកុងស៊ុលអ៊ីរ៉ង់ ក្នុងរដ្ឋធានីរបស់ប្រទេសស៊ីរី កាលពីដើមសប្តាហ៍នេះ។
មន្ត្រីការទូតអ៊ីស្រាអ៊ែលអនាមិកម្នាក់បានបញ្ជាក់ប្រាប់កាសែតស៊ីនហួរកាលពីថ្ងៃសុក្រថា ស្ថានទូតអ៊ីស្រាអែលប្រហែល ៣០ នៅទូទាំងពិភពលោកត្រូវបានបិទជាបណ្តោះអាសន្ន សម្រាប់ការវាយប្រហារ ដែលអាចកើតមាននៅបរទេស។ មន្ត្រីរូបនេះមិនបានបញ្ជាក់ថា តើស្ថានទូតណាខ្លះត្រូវបានបិទ ឬនឹងបើកវិញនៅពេលណានោះទេ។
អ៊ីស្រាអែលក៏កំពុងវាយលុកសញ្ញា GPS នៅកណ្តាលអ៊ីស្រាអែល និងក្រុងយេរ៉ូសាឡឹម ដើម្បីរំខានដល់ការវាយប្រហារដោយមីស៊ីល និងយន្តហោះដ្រូន អ្នកស្រុកនៅទីក្រុង Tel Aviv ដែលជាមជ្ឈមណ្ឌលហិរញ្ញវត្ថុ និងវប្បធម៌របស់អ៊ីស្រាអែល បានរកឃើញថា កម្មវិធីផែនទីនៅលើទូរស័ព្ទដៃរបស់ពួកគេបានដាក់ពួកវានៅក្នុងទីក្រុង Beirut ប្រទេសលីបង់។ អ្នកបើកតាក់ស៊ីពិបាកធ្វើដំណើរជុំវិញទីក្រុង ហើយកម្មវិធីដឹកជញ្ជូនអាហារត្រូវបានបិទជាបណ្តោះអាសន្ន ដោយការរំខាន GPS នៅកណ្តាលអ៊ីស្រាអែល គឺកម្រកើតមានណាស់។
នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានឲ្យដឹងនៅក្នុងកិច្ចប្រជុំគណៈរដ្ឋមន្ត្រីសន្តិសុខកាលពីល្ងាចថ្ងៃព្រហស្បតិ៍ថា “យើងនឹងដឹងពីរបៀបការពារខ្លួន ហើយយើងនឹងធ្វើសកម្មភាពតាមគោលការណ៍សាមញ្ញ អ្នកណាដែលធ្វើបាបយើង ឬគ្រោងធ្វើបាបយើង យើងនឹងធ្វើបាបពួកគេ” ។
ការវាយប្រហារតាមអាកាសរបស់អ៊ីស្រាអែលកាលពីថ្ងៃអង្គារបានផ្តោតលើបរិវេណស្ថានទូតអ៊ីរ៉ង់ក្នុងក្រុងដាម៉ាស។ សមាជិក ៧នាក់នៃកងឆ្មាំបដិវត្តន៍អ៊ីស្លាម (IRGC) របស់អ៊ីរ៉ង់ត្រូវបានសម្លាប់ រួមទាំងលោក Mohammad Reza Zahedi មេបញ្ជាការជាន់ខ្ពស់នៅក្នុងកងកម្លាំង al-Quds អនុប្រធានរបស់លោក និងទីប្រឹក្សាយោធា ៥នាក់ទៀត។
មេដឹកនាំកំពូលអ៊ីរ៉ង់ Ayatollah Ali Khamenei បានប្តេជ្ញាសងសឹក ដោយលោកបានលើកឡើងថា អ៊ីស្រាអែល នឹងត្រូវ “ដាក់ទណ្ឌកម្មដោយដៃរបស់បុរសក្លាហានរបស់យើង យើងនឹងធ្វើឱ្យខ្លួនសោកស្តាយ ចំពោះឧក្រិដ្ឋកម្មនេះ និងអ្នកដទៃដែលប្រទេសនេះបានប្រព្រឹត្ត”៕ ប្រែសម្រួល ឈូក បូរ៉ា
