បរទេស៖ អធិការបតីអាល្លឺម៉ង់ លោក Olaf Scholz បាននិយាយកាលពីថ្ងៃព្រហស្បតិ៍ថា សមាជិកនៃអង្គការណាតូគួរតែស្វែងរកប្រព័ន្ធការពារដែនអាកាស Patriot ដែលផលិតដោយសហរដ្ឋអាមេរិកបន្ថែមទៀតសម្រាប់ផ្តល់ឱ្យប្រទេសអ៊ុយក្រែន។ ទីក្រុងប៊ែរឡាំងបានសន្យាថានឹងផ្តល់ប្រព័ន្ធការពារអាកាសបែបនេះក្នុងពេលអនាគតដ៏ខ្លី បន្ថែមពីលើប្រព័ន្ធពីរដែលខ្លួនបានបញ្ជូនរួចហើយទៅកាន់ទីក្រុងគៀវ។
យោងតាមសារព័ត៌មាន RT ចេញផ្សាយនៅថ្ងៃទី១៨ ខែមេសា ឆ្នាំ២០២៤ បានឱ្យដឹងថា លោក Scholz បាននិយាយថា លោកបានស្វែងរកការផ្សព្វផ្សាយគំនិតនេះក្នុងអំឡុងពេល “ការពិភាក្សាជាច្រើន” នៅក្នុងកិច្ចប្រជុំកំពូលរបស់ EU ដែលធ្វើឡើងនៅថ្ងៃពុធ និងថ្ងៃព្រហស្បតិ៍។
អធិការបតីអាល្លឺម៉ង់រូបនេះបាននិយាយថា “យើងបានឮថាឥឡូវនេះគួរតែមានប្រាំពីរបន្ថែមទៀត មួយក្នុងចំណោមប្រព័ន្ធការពារដែនអាកាសនោះ គឺជារបស់យើង ហើយបន្ទាប់មកយើងសង្ឃឹមថា ៦គ្រឿងទៀតនឹងត្រូវបានរកឃើញ” ដោយសមាជិកណាតូដទៃទៀត។
លោក Scholz បានអះអាងថា រហូតមកដល់ពេលនេះ ទីក្រុងប៊ែរឡាំងបានធ្វើ “ការរួមចំណែកដ៏អស្ចារ្យបំផុត” នៅពេលផ្តល់ឱ្យអ៊ុយក្រែននូវប្រព័ន្ធការពារដែនអាកាស Patriot ដោយបន្ថែមថា លោកបានអំពាវនាវឱ្យអ្នកដទៃធ្វើការសម្រេចចិត្តដូចគ្នានេះ។ សហរដ្ឋអាមេរិក អាល្លឺម៉ង់ និងហូឡង់ បានបញ្ជូនប្រព័ន្ធការពារដែនអាកាស Patriot ជាច្រើនទៅកាន់អ៊ុយក្រែន ដើម្បីគាំទ្រដល់ជម្លោះរបស់ទីក្រុងគៀវជាមួយរុស្ស៊ី។
ចំនួនពិតប្រាកដនៃប្រព័ន្ធការពារដែនអាកាសទាំងនោះនៅក្នុងការកាន់កាប់របស់អ៊ុយក្រែននៅមិនទាន់ច្បាស់នៅឡើយនោះទេ។ យោងតាមសារព័ត៌មាន Business Insider , ក្រុងគៀវអាចមានប្រព័ន្ធ Patriots ចន្លោះពី ៣ ទៅ ៥គ្រឿង។ ក្រសួងការពារជាតិរុស្ស៊ីបានផ្តល់ភស្តុតាងថា កាំជ្រួច និងរ៉ាដាជាច្រើនត្រូវបានបំផ្លាញរួចហើយ។
នាយករដ្ឋមន្ត្រីហូឡង់ លោក Mark Rutte បានបញ្ចេញប្រតិកម្មខ្លាំងៗទៅកាន់ប្រជាជាតិនានា ដែលស្ទាក់ស្ទើរក្នុងការស្វែងរកឃ្លាំងស្តុកមីស៊ីលរបស់ពួកគេ ដើម្បីផ្តល់ឱ្យទីក្រុង គៀវ៕ប្រែសម្រួលៈ ណៃ តុលា
