អង់ការ៉ា៖ តួកគី បានបញ្ឈប់ការនាំចេញ និងការនាំចូលទាំងអស់ទៅកាន់ និងមកពីប្រទេសអ៊ីស្រាអែល នេះបើតាមប្រព័ន្ធផ្សព្វផ្សាយបានរាយការណ៍ កាលពីថ្ងៃព្រហស្បតិ៍។
គេហទំព័រ Bloomberg បានរាយការណ៍ថា ទីក្រុងអង់ការ៉ា បានបញ្ឈប់ពាណិជ្ជកម្មទាំងអស់ជាមួយអ៊ីស្រាអែល គិតត្រឹមថ្ងៃព្រហស្បតិ៍ ជុំវិញការកើនឡើងភាពតានតឹងដោយសារតែជម្លោះដែលកំពុងបន្តនៅតំបន់ហ្គាហ្សាស្ទ្រីប ដោយដកស្រង់សម្តីមន្ត្រីតួកគី ដែលមិនបញ្ចេញ ឈ្មោះពីរនាក់ ដែលដឹងពីបញ្ហានេះ។
មិនទាន់មានសេចក្តីថ្លែងការណ៍ផ្លូវការណាមួយត្រូវបានចេញដោយរដ្ឋាភិបាលតូកគី លើវានៅឡើយទេ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
កាលពីថ្ងៃព្រហស្បតិ៍ផងដែរ រដ្ឋមន្ត្រីការបរទេស អ៊ីស្រាអែលលោក Israel Katz បានសរសេរនៅលើប្រព័ន្ធ ផ្សព្វផ្សាយសង្គម X ថាប្រធានាធិបតីតួកគីលោក Recep Tayyip Erdogan “កំពុងបំពានកិច្ចព្រមព្រៀងដោយការបិទច្រក សម្រាប់ការនាំចូល និងការនាំចេញរបស់អ៊ីស្រាអែល”។
លោក Katz បានចោទប្រកាន់លោក Erdogan ថា “មិនយកចិត្តទុកដាក់ ចំពោះផលប្រយោជន៍របស់ប្រជាជន និងអ្នកជំនួញតួកគី ហើយមិនអើពើកិច្ចព្រមព្រៀង ពាណិជ្ជកម្មអន្តរជាតិ” ដោយបន្ថែមថា លោកបានណែនាំ ក្រសួងរបស់លោកឱ្យ “ចូលរួមភ្លាមៗ ជាមួយភាគីពាក់ព័ន្ធទាំងអស់នៅក្នុងរដ្ឋាភិបាល ដើម្បីបង្កើតជម្រើសជំនួស សម្រាប់ពាណិជ្ជកម្មជាមួយតួកគី ដោយផ្តោតលើមូលដ្ឋាន ផលិតកម្ម និងការនាំចូលពីប្រទេសផ្សេងទៀត”។
ការផ្លាស់ប្តូរពាណិជ្ជកម្ម ដែលបានរាយការណ៍ របស់ទីក្រុង អង់ការ៉ា បានកើតឡើងបន្ទាប់ពីតួកគី បានដាក់កម្រិតរួច ហើយលើការ នាំចេញទៅកាន់ប្រទេស អ៊ីស្រាអែល ចាប់តាំងពីខែមុន ដែលទីក្រុងអង់ការ៉ា បានឲ្យដឹងថានឹងនៅតែមាន សុពលភាពដោយរង់ចាំបទ ឈប់បាញ់នៅហ្គាហ្សា៕
ប្រែសម្រួល ឈូក បូរ៉ា
