បរទេស៖ នាយករដ្ឋមន្ត្រី អ៊ីស្រាអែល លោក Benjamin Netanyahu បានអះអាងថា មានមនុស្សតែពីរបីនាក់ប៉ុណ្ណោះ ដែលត្រូវបានបញ្ជាក់ជាផ្លូវការថា បានស្លាប់ដោយសារការអត់ឃ្លាន ក្នុងចំណោមជនស៊ីវិល ប៉ាឡេស្ទីននៅក្នុងតំបន់ ហ្គាហ្សា ជុំវិញដំណើរនៃសង្រ្គាមអ៊ីស្រាអែល ដែលកំពុងបន្តជាមួយក្រុមហាម៉ាស ដោយលោកបានច្រានចោល ការចោទប្រកាន់ របស់តុលាការឧក្រិដ្ឋកម្មអន្តរជាតិថា ជាការភូតកុហក។
យោងតាមសារព័ត៌មាន RT ចេញផ្សាយនៅថ្ងៃទី២២ ខែឧសភា ឆ្នាំ២០២៤ បានឱ្យដឹងថា រដ្ឋអាជ្ញាកំពូល របស់តុលាការ ឧក្រិដ្ឋកម្មអន្តរជាតិ ឬ ICC លោក Karim Khan បានស្នើសុំដីកា សម្រាប់ទាំងលោក Netanyahu និងរដ្ឋមន្ត្រីការពារជាតិ អ៊ីស្រាអែល Yoav Gallant ដោយអះអាងថាមាន “ហេតុផលគួរជឿ” ដែលមន្ត្រីកំពូលៗ មានទោសពីបទ “បង្កការអត់ឃ្លានរបស់ជនស៊ីវិលជាវិធីសាស្រ្តមួយនៃសង្គ្រាមជាឧក្រិដ្ឋកម្មសង្គ្រាម” និង “ការសម្លាប់រង្គាល និង/ឬឃាតកម្ម… ក្នុងបរិបទនៃការស្លាប់ដែលបណ្តាលមកពីការអត់ឃ្លាន ជាឧក្រិដ្ឋកម្មប្រឆាំងមនុស្សជាតិ”។
រដ្ឋអាជ្ញារបស់ ICC ក៏បានចោទប្រកាន់អ៊ីស្រាអែលពី “ការវាយប្រហារ ផ្សេងទៀតលើជនស៊ីវិល រួមទាំងអ្នកដែលតម្រង់ ជួរស្វែងរកអាហារ” ក៏ដូចជា “ការរារាំងការផ្តល់ ជំនួយដោយភ្នាក់ងារមនុស្សធម៌” ដែលជាការចោទប្រកាន់ ដែលត្រូវបានបដិសេធ យ៉ាងខ្លាំងក្លាដោយលោក Netanyahu នៅក្នុងបទសម្ភាសន៍ជាមួយទូរទស្សន៍ CNN Jake Tapper កាលពីថ្ងៃអង្គារ។
លោក Netanyahu បានអះអាងថា “ ចូរយើងទទួលបន្ទុកនៃភាពអត់ឃ្លាននេះ៖ យើងបានដាក់អាហារ និងថ្នាំចំនួន ៥០ម៉ឺនតោនសម្រាប់ប្រជាជននេះ ។ យើងបានយករថយន្តដឹកជញ្ជូនចំនួន ២ម៉ឺនគ្រឿង។ យើងបានត្រួសត្រាយផ្លូវ ដើម្បីឱ្យរថយន្តទាំងនោះចូល។ យើងបានបើកច្រកព្រំដែនដែលក្រុម Hamas បានបិទ។ ខ្ញុំមានយន្តហោះទម្លាក់ជំនួយ ការផ្គត់ផ្គង់ផ្លូវសមុទ្រ” ។ ដូច្នេះ “ខ្ញុំមានន័យថា រឿងទាំងមូលគឺមិនសមហេតុផល។ អ្នកគួរតែដឹងរឿងនេះ ខ្ញុំមានន័យថា តម្លៃអាហារនៅហ្គាហ្សាបានធ្លាក់ ៨០ ភាគរយ, ទីផ្សារមិនកុហកទេ»។
លោកបន្តថា «ខ្ញុំគិតថា ២៣ ករណី ឬ ៣០ ករណីនៃកង្វះអាហារូបត្ថម្ភក្នុងចំនួនប្រជាជន ២ លាននាក់… មិនអីទេ សហរដ្ឋអាមេរិកក្នុងឆ្នាំ ២០២២ មានអ្នកស្លាប់ដោយសារ កង្វះអាហារូបត្ថម្ភចំនួន ២០.០០០នាក់ ដែលចំនួននេះ គឺច្រើនជាងនៅហ្គាហ្សាបីដងឯណោះ ៕
ប្រែសម្រួលៈ ណៃ តុលា
