បរទេស៖ យោងតាមការចេញផ្សាយរបស់ RT រដ្ឋមន្ត្រីការបរទេសបារាំង លោក Stephane Sejourne បាននិយាយកាលពីថ្ងៃពុធថា លក្ខខណ្ឌសម្រាប់ប្រទេសបារាំង ក្នុងការទទួលស្គាល់ប៉ាឡេស្ទីនជាផ្លូវការ ជារដ្ឋមួយមិនទាន់ត្រូវបានបំពេញគ្រប់គ្រាន់នៅឡើយ។
ការអះអាងរបស់គាត់បានកើតឡើង បន្ទាប់ពីប្រទេសន័រវេស អៀរឡង់ និងអេស្បាញបានប្រកាសថា ពួកគេនឹងទទួលស្គាល់ជាផ្លូវការ នូវភាពជារដ្ឋរបស់ប៉ាឡេស្ទីន ចាប់ពីថ្ងៃទី២៨ ខែឧសភា ដើម្បីគាំទ្រដល់អ្វីដែលគេហៅថា ដំណោះស្រាយរដ្ឋពីរ ដែលមានបំណងនាំមកនូវ សន្តិភាពដល់មជ្ឈិមបូព៌ា។
ក្នុងនោះកាសែតAFP ក៏បានដកស្រង់សម្តីលោក Sejourne ដែរថា៖ ជំហររបស់យើងគឺច្បាស់លាស់ ការទទួលស្គាល់រដ្ឋប៉ាឡេស្ទីន មិនមែនជាការហាមឃាត់សម្រាប់ប្រទេសបារាំងទេ ។ រដ្ឋមន្ត្រីការបរទេសរូបនេះបានបញ្ជាក់ជាថ្មី ពីជំហរលើកដំបូងដោយប្រធានាធិបតី Emmanuel Macron ក្នុងខែកុម្ភៈ។
រំលឹកដែរថាកាលពីដើមខែនេះ បារាំងបានអំពាវនាវឱ្យបង្កើត រដ្ឋប៉ាឡេស្ទីនឯករាជ្យមួយ។ លោក Macron បានធ្វើសេចក្តីថ្លែងការណ៍បន្ទាប់ពី ដំណើរទស្សនកិច្ចទៅទីក្រុងប៉ារីសរបស់មេដឹកនាំចិន Xi Jinping៕
ប្រែសម្រួល៖ ស៊ុន លី
