បរទេស៖ មេដឹកនាំនៃតំបន់ Chechnya របស់រុស្ស៊ី លោក រាំសាន ខាឌីរ៉ូវ បាននិយាយនៅព្រឹកថ្ងៃព្រហស្បតិ៍ថា លោកបានជួបជាមួយប្រធានាធិបតី វ្លាឌីមៀ ពូទីន នៅវិមានក្រឹមឡាំង ហើយលោក ពូទីន បានស្នើឱ្យបញ្ជូនអ្នកប្រយុទ្ធបន្ថែមទៀត ដើម្បីជួយទីក្រុងមូស្គូ ក្នុងជម្លោះដែលមានរយៈពេលជាងពីរឆ្នាំនៅអ៊ុយក្រែន។
យោងតាមសារព័ត៌មាន Reuters ចេញផ្សាយនៅថ្ងៃទី២៣ ខែឧសភា ឆ្នាំ២០២៤ បានឱ្យដឹងថា លោក ខាឌីរ៉ូវ ដែលបានដឹកនាំតំបន់ South Caucasus ក្នុងនាមជាអ្នកស្មោះត្រង់របស់វិមានក្រឹមឡាំងតាំងពីឆ្នាំ ២០០៧ បានបង្ហោះរូបថតរបស់លោកជាមួយលោកពូទីន ហើយបាននិយាយថា លោកបានពិភាក្សាអំពីបញ្ហាសេដ្ឋកិច្ច និងទស្សនវិស័យរបស់តំបន់ ហើយបានអញ្ជើញប្រធានាធិបតីមកទស្សនកិច្ច។
លោកបាននិយាយថា យុទ្ធជនរាប់ម៉ឺននាក់ ដែលបានទទួលការហ្វឹកហ្វឺនយ៉ាងល្អ និងត្រៀមបំរុង ត្រូវបានរៀបចំដើម្បីប្រយុទ្ធសម្រាប់ប្រទេសរុស្ស៊ីនៅអ៊ុយក្រែន ប្រសិនបើការបញ្ជាបែបនេះត្រូវបានផ្តល់ឱ្យ។
លោកបាននិយាយថា កងទ័ពសរុបចំនួន ៤៣.៥០០ នាក់ បានបម្រើការនៅក្នុងប្រទេសអ៊ុយក្រែនរួចហើយ រួមទាំងអ្នកស្ម័គ្រចិត្តចំនួន ១៨.០០០ នាក់ផងដែរ។
លោក ខាឌីរ៉ូវ បានសរសេរថា “ខ្ញុំក៏បានបញ្ជូនបំណងប្រាថ្នារបស់ប្រជាជនរបស់យើង និងបានអញ្ជើញមេដឹកនាំជាតិរបស់យើងឱ្យមកធ្វើទស្សនកិច្ចនៅសាធារណរដ្ឋឆេឆេន” ។ លោក ខាឌីរ៉ូវ បានបដិសេធម្តងហើយម្តងទៀតនូវរបាយការណ៍ដែលថា លោកមិនមានសុខភាពល្អ ហើយបានបង្ហោះរូបភាពដែលខ្លួនលោកកំពុងហាត់ប្រាណ និងធ្វើការប្រជុំ៕ ប្រែសម្រួលៈ ណៃ តុលា
