បរទេស៖ អ៊ុយក្រែន បានទទួលជំនួយយោធាថ្មីជាង ១ ពាន់លានដុល្លារ ពីប្រទេសបែលហ្ស៊ិក ក្នុងកិច្ចព្រមព្រៀងមួយនៅថ្ងៃអង្គារ ដែលរួមមានការផ្តល់ យន្តហោះចម្បាំង F-16 ចំនួន ៣០ គ្រឿង។
យោងតាមសារព័ត៌មាន VOA ចេញផ្សាយ នៅថ្ងៃទី២៨ ខែឧសភា ឆ្នាំ២០២៤ បានឱ្យដឹងថា កិច្ចព្រមព្រៀងនេះ បានកើតឡើងនៅពេល ដែលប្រធានាធិបតី អ៊ុយក្រែន លោក Volodymyr Zelenskyy បានធ្វើទស្សនកិច្ច នៅទីក្រុងប្រ៊ុចសែល ក្នុងដំណើរមួយ ដែលរួមបញ្ចូលទាំងការឈប់ នៅប្រទេសអេស្ប៉ាញ និងព័រទុយហ្គាល់ ក្នុងការស្វែងរកជំនួយថ្មីៗដើម្បីប្រយុទ្ធប្រឆាំងនឹងការឈ្លានពាន របស់រុស្ស៊ីដែលបានចាប់ផ្តើមនៅដើមឆ្នាំ ២០២២ ។
លោក Zelenskyy បាននិយាយនៅលើទំព័រ X ថា “កិច្ចព្រមព្រៀងនេះធានានូវជំនួយ សន្តិសុខទាន់ពេលវេលា របស់ប្រទេសបែលហ្ស៊ិក រថពាសដែកទំនើប បរិក្ខារ ដើម្បីបំពេញតម្រូវការកងទ័ពអាកាស និងការពារដែនអាកាស របស់អ៊ុយក្រែន សន្តិសុខកងទ័ពជើងទឹក ការបោសសម្អាតមីន ការចូលរួមនៅក្នុងក្រុមចម្រុះនៃគ្រាប់កាំភ្លើងធំ និងការបណ្តុះបណ្តាលយោធា” ។
មេដឹកនាំអ៊ុយក្រែនបាននិយាយថា កិច្ចព្រមព្រៀងរយៈពេល ១០ ឆ្នាំក៏រួមបញ្ចូលផងដែរ នូវកិច្ចសហប្រតិបត្តិការ ជាមួយបែលហ្សិកលើការ ស៊ើបការណ៍សម្ងាត់ សន្តិសុខតាមអ៊ីនធឺណិត ការប្រឆាំងព័ត៌មានមិនពិត និងឧស្សាហកម្មការពារជាតិ។
ប្រទេសអ៊ុយក្រែន និងអេស្បាញ បានប្រកាសកិច្ចព្រមព្រៀងកាលពីថ្ងៃច័ន្ទសម្រាប់ជំនួយយោធាចំនួន ១,១ ពាន់លានដុល្លារនៅឆ្នាំនេះ និងច្រើនជាង ៥ ពាន់លានដុល្លារនៅឆ្នាំ ២០២៧ ដោយអេស្បាញបានប្រគល់រថក្រោះ Leopard និងគ្រាប់កាំភ្លើងធំដល់អ៊ុយក្រែន៕
ប្រែសម្រួលៈ ណៃ តុលា
