បរទេស៖ ក្រុមអ្នកជំនាញស្វីសបាននិយាយនៅក្នុងរបាយការណ៍មួយដែលបញ្ជាដោយក្រសួងការពារជាតិនៅទីក្រុង Bern ថា វាជាពេលវេលាសម្រាប់ប្រទេសស្វ៊ីសដែលមានអព្យាក្រឹតតាំងពីឆ្នាំ១៥១៥ ដើម្បីកំណត់ស្ថានភាពមិនចូលបក្សសម្ព័ន្ធរបស់ខ្លួនឡើងវិញ។ ជាការឆ្លើយតប អ្នករិះគន់បានចោទប្រកាន់ក្រុមដែលនៅពីក្រោយឯកសារនោះថា មានភាពលម្អៀង ហើយទទូចថា អព្យាក្រឹតភាពត្រូវបានចែងជារៀងរហូតនៅក្នុងរដ្ឋធម្មនុញ្ញរបស់ប្រទេសនេះ។
យោងតាមសារព័ត៌មាន RT ចេញផ្សាយនៅថ្ងៃទី៣១ ខែសីហា ឆ្នាំ២០២៤ បានឱ្យដឹងថា គណៈកម្មាធិការសិក្សាដែលត្រូវបានបង្កើតឡើងកាលពីមួយឆ្នាំមុន បានបង្ហាញឯកសារមួយកាលពីថ្ងៃព្រហស្បតិ៍ជាមួយនឹងអនុសាសន៍ចំនួន ១០០ ស្តីពីវិធីជំរុញសន្តិសុខរបស់ប្រទេសនៅលើភ្នំ Alpine ។
សមាជិកនៃក្រុមនេះ ដែលត្រូវបានគេនិយាយថា រួមបញ្ចូលអ្នកនយោបាយ អ្នកសេដ្ឋកិច្ច និងអ្នកវិទ្យាសាស្ត្រ ដែលតំណាងឱ្យក្រុមអាយុ និងតំបន់ផ្សេងៗគ្នា ស្នើនៅក្នុងរបាយការណ៍ថា “គោលនយោបាយអព្យាក្រឹតភាពចាំបាច់ត្រូវកែសម្រួល ផ្តោតលើមុខងារសន្តិសុខរបស់ប្រទេស និងអនុវត្តកាន់តែមានភាពបត់បែន” ។
អនុសាសន៍សំខាន់មួយទៀតនៅក្នុងឯកសារគឺថា “កិច្ចសហប្រតិបត្តិការរបស់ស្វីសជាមួយអង្គការណាតូ និងសហភាពអឺរ៉ុប គឺត្រូវតែបន្តធ្វើឱ្យស៊ីជម្រៅក្នុងគោលបំណងដើម្បីសម្រេចបាននូវសមត្ថភាពការពារជាតិរួម និងក្លាយជាកិច្ចសហប្រតិបត្តិការការពារជាតិពិតប្រាកដ” ៕
ប្រែសម្រួលៈ ណៃ តុលា
