បរទេស ៖ យោងតាមការចេញផ្សាយរបស់ RT នាយករដ្ឋមន្ត្រីហុងគ្រី លោក Viktor Orban បានប្រាប់អង្គប្រជុំពេញអង្គ នៃសភាអឺរ៉ុបកាលពីថ្ងៃពុធថា ការបដិសេធរបស់សហភាព អឺរ៉ុបឬហៅកាត់ថា EU ក្នុងការទិញថាមពលពីរុស្ស៊ី បានធ្វើឱ្យខូចដល់កំណើន សេដ្ឋកិច្ចរបស់ប្លុកនេះទាំងមូល រហូតមកដល់បច្ចុប្បន្ន។
លោកOrban ដែលប្រទេស របស់លោកបច្ចុប្បន្ន កាន់តំណែងជាប្រធានាធិបតី ប្តូរវេនរយៈពេលប្រាំមួយខែរបស់ EU បានចេញសេចក្តីថ្លែងការណ៍បែបនេះ ទៅកាន់សភាក្នុងទីក្រុង Strasbourg ប្រទេសបារាំង ។ លោកបានពោលថា ៖ ផលិតភាពរបស់សហភាពអឺរ៉ុប កំពុងកើនឡើងក្នុងល្បឿនយឺតជាងដៃ គូប្រកួតប្រជែងរបស់យើង ។ ចំណែកពាណិជ្ជកម្មពិភពលោករបស់អឺរ៉ុប ក៏កំពុងធ្លាក់ចុះដូចគ្នាដែរ ។
លោកបានបន្ថែមទៀតថា អាជីវកម្មរបស់សហភាព អឺរ៉ុបកំពុងប្រឈម នឹងតម្លៃអគ្គិសនីដែលខ្ពស់ជាងនៅអាមេរិក ២ ទៅ ៣ ដងហើយនៅពេលនិយាយ អំពីឧស្ម័នធម្មជាតិ តម្លៃបច្ចុប្បន្នគឺ មានកម្រិតខ្ពស់ជាង៤ទៅ៥ដង ។
យោងតាមការបញ្ជាក់ បន្ថែមដោយលោក Orban ពាក់កណ្តាលនៃក្រុមហ៊ុនអ៊ឺរ៉ុបចាត់ទុកថា តម្លៃថាមពលគឺជា ឧបសគ្គចម្បង សម្រាប់ការវិនិយោគហើយ លោកបានអះអាងថា នៅក្នុងឧស្សាហកម្មដែលពឹងផ្អែកខ្លាំងលើថាមពល ដែលមានសារៈសំខាន់សម្រាប់សេដ្ឋកិច្ចរបស់ប្លុកនេះ ផលិតកម្មបានធ្លាក់ចុះពី១០ទៅ ទៅ ១៥ភាគរយ ។
គួរឲ្យដឹងដែរថានាយករដ្ឋមន្ត្រីហុងគ្រីរូបនេះ ក៏បានបន្ថែមដែរថា EU មិនគួរស្ថិតនៅក្រោមការបំភាន់ថា ការផ្លាស់ប្តូរពណ៌បៃតង នឹងដោះស្រាយបញ្ហានោះទេ ។ លោកបានលើកឡើងពីលទ្ធផល សិក្សាដែលបង្ហាញថាជាចំណែកនៃឥន្ធនៈហ្វូស៊ីលនឹងមិនមានការ ប្រែប្រួលខ្លាំងរហូតដល់ឆ្នាំ ២០៣០នោះ៕
ប្រែសម្រួល៖ស៊ុនលី
