គៀវ៖ ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានសម្តែងការត្រៀមខ្លួន ដើម្បីបញ្ចប់ “ដំណាក់កាលក្តៅ” នៃជម្លោះជាមួយរុស្ស៊ី ជាថ្នូរនឹងការចូលជាសមាជិករបស់អ៊ុយក្រែន នៅក្នុងអង្គការសន្ធិសញ្ញាអាត្លង់ទិកខាងជើង (ណាតូ)។
លោក ហ្សេឡិនស្គី បានលើកឡើងថា “ប្រសិនបើយើងចង់បញ្ឈប់ដំណាក់កាលក្តៅនៃសង្រ្គាម យើងត្រូវដាក់ទឹកដីអ៊ុយក្រែន ដែលស្ថិតនៅក្រោមការគ្រប់គ្រងរបស់យើងនៅក្រោមឆ័ត្រណាតូ។ យើងត្រូវធ្វើវាឱ្យលឿន”។
លោកបានបន្ដថា ក្រោយមក អ៊ុយក្រែនអាចទទួលបានមកវិញនូវទឹកដី ដែលឥឡូវនេះត្រូវបានគ្រប់គ្រងដោយរុស្ស៊ី តាមវិធីការទូត នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានកត់សម្គាល់ថា ការអញ្ជើញណាតូគួរទទួលស្គាល់ព្រំដែន ដែលទទួលស្គាល់ជាអន្តរជាតិរបស់អ៊ុយក្រែន។ លោកបានសង្កត់ធ្ងន់ថា បទឈប់បាញ់គឺជាការចាំបាច់ ដើម្បីធានាថារុស្ស៊ី “មិនត្រឡប់មកវិញ” ដើម្បីដណ្តើមយកទឹកដីអ៊ុយក្រែនបន្ថែមទៀត៕
ប្រែសម្រួល ឈូក បូរ៉ា
