ប្រេស៊ីល៖ រដ្ឋាភិបាលប្រេស៊ីល បានរិះគន់សហរដ្ឋអាមេរិក ចំពោះការដំឡើងពន្ធបន្ថែម ១០ ភាគរយ លើការនាំចេញទាំងអស់របស់ប្រេស៊ីល ដោយថា ទង្វើនេះបានរំលោភលើការប្តេជ្ញាចិត្តរបស់ទីក្រុងវ៉ាស៊ីនតោន ចំពោះអង្គការពាណិជ្ជកម្មពិភពលោក (WTO) នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ក្រសួងការបរទេសប្រេស៊ីល បាននិយាយនៅក្នុងសេចក្តីថ្លែងការណ៍មួយថា អតិរេកពាណិជ្ជកម្មរបស់សហរដ្ឋអាមេរិកជាមួយប្រទេសប្រេស៊ីលក្នុងឆ្នាំ២០២៤ មានចំនួនប្រហែល ៧ ពាន់លានដុល្លារអាមេរិកនៅក្នុងទំនិញតែម្នាក់ឯង ហើយអតិរេកបានកើនឡើងដល់ ២៨.៦ ពាន់លានដុល្លារកាលពីឆ្នាំមុន នៅពេលដែលទំនិញ និងសេវាកម្មត្រូវបានរួមបញ្ចូលគ្នា ដោយកត់សម្គាល់ថា “នេះតំណាងឱ្យអតិរេកពាណិជ្ជកម្មធំបំផុតទីបី សម្រាប់សហរដ្ឋអាមេរិកនៅទូទាំងពិភពលោក” ។
ក្រសួងបានឲ្យដឹងថា ដោយសារសហរដ្ឋអាមេរិកបានកត់ត្រាអតិរេកពាណិជ្ជកម្មដែលកើតឡើងដដែលៗ និងគួរឱ្យកត់សម្គាល់ចំនួន ៤១០ ពាន់លានដុល្លារនៅក្នុងទំនិញ និងសេវាកម្មជាមួយប្រេស៊ីលក្នុងរយៈពេល ១៥ ឆ្នាំកន្លងមក ការដាក់ឯកតោភាគីនៃពន្ធបន្ថែម ១០ ភាគរយលើប្រេស៊ីលក្រោមហេតុផលនៃការស្ដារសមតុល្យឡើងវិញ និងធានា “ការសងខាងពាណិជ្ជកម្ម” មិនឆ្លុះបញ្ចាំងពីការពិតនោះទេ។
ក្រសួងបានឲ្យដឹងទៀតថា “ក្នុងការការពារកម្មករ និងអាជីវកម្មប្រេស៊ីល ហើយស្របតាមការប្តេជ្ញាចិត្តដ៏រឹងមាំរបស់ខ្លួនចំពោះប្រព័ន្ធពាណិជ្ជកម្មពហុភាគី រដ្ឋាភិបាលប្រេស៊ីលនឹងពិគ្រោះយោបល់ជាមួយឧស្សាហកម្មក្នុងស្រុក ដើម្បីការពារផលប្រយោជន៍របស់ពួកគេ និងស្វែងរកការសន្ទនាជាមួយរដ្ឋាភិបាលសហរដ្ឋអាមេរិក”។
ខណៈពេលដែលរដ្ឋាភិបាលនៅតែបើកទូលាយក្នុងការជំរុញកិច្ចសន្ទនាដែលខ្លួនបានបង្កើតក្នុងប៉ុន្មានសប្តាហ៍ថ្មីៗនេះជាមួយសហរដ្ឋអាមេរិក ប្រេស៊ីល “កំពុងវាយតម្លៃគ្រប់សកម្មភាពដែលអាចធ្វើទៅបាន ដើម្បីធានាឱ្យគ្នាទៅវិញទៅមកក្នុងពាណិជ្ជកម្មទ្វេភាគី រួមទាំងការងាកទៅរក WTO ដើម្បីការពារផលប្រយោជន៍ជាតិស្របច្បាប់របស់ប្រទេសប្រេស៊ីល”។
គួរបញ្ជាក់ផងដែរថា ប្រធានាធិបតីអាមេរិកលោក ដូណាល់ ត្រាំ កាលពីថ្ងៃពុធបានចុះហត្ថលេខាលើបទបញ្ជាប្រតិបត្តិលើអ្វីដែលគេហៅថា “ពន្ធគយ” ដោយដាក់ពន្ធគយ ១០ ភាគរយ ជាពន្ធមូលដ្ឋានអប្បបរមា និងអត្រាខ្ពស់ជាងនេះលើដៃគូពាណិជ្ជកម្មរបស់ខ្លួនមួយចំនួន៕
ប្រែសម្រួល ឈូក បូរ៉ា
