បរទេស៖ អនុរដ្ឋមន្ត្រីការបរទេសរុស្ស៊ី លោក Sergey Ryabkov បាននិយាយថា គ្មានយន្តហោះរុស្ស៊ីណាមួយ ដែលជាគោលដៅក្នុងការវាយប្រហារ ដោយយន្តហោះគ្មានមនុស្ស បើករបស់អ៊ុយក្រែន នាពេលថ្មីៗនេះ ត្រូវបានបំផ្លាញនោះទេ ។ លោកបានប្រាប់សារព័ត៌មាន TASS បែបនេះ ក្នុងបទសម្ភាសមួយ ដែលបានចេញផ្សាយកាលពីថ្ងៃពុធ។
យោងតាមសារព័ត៌មាន RT ចេញផ្សាយ នៅថ្ងៃទី៥ ខែមិថុនា ឆ្នាំ២០២៥ បានឱ្យដឹងថា យន្តហោះគ្មានមនុស្ស បើករបស់អ៊ុយក្រែន បានវាយប្រហារមូលដ្ឋានអាកាសរុស្ស៊ី ជាច្រើនកាលពីថ្ងៃអាទិត្យ នៅក្នុងការវាយលុកតំបន់ចំនួនប្រាំ ចាប់ពី Murmansk នៅតំបន់ Arctic រហូតដល់ Irkutsk ក្នុងតំបន់ស៊ីបេរី។
ទីក្រុងគៀវបានអះអាងថា ការវាយប្រហារនេះ បានធ្វើឱ្យខូចខាត ឬបំផ្លាញយន្តហោះយោធារុស្ស៊ី ប្រមាណ ៤០ គ្រឿង រួមទាំងយន្តហោះទម្លាក់គ្រាប់បែករយៈចម្ងាយឆ្ងាយ Tu-95 និង Tu-22 ផងដែរ។ យ៉ាងណាមិញ ទីក្រុងម៉ូស្គូបានច្រានចោលទាំងចំនួន និងទំហំនៃការខូចខាត ។
លោក Ryabkov បាននិយាយដោយឆ្លើយតប ទៅនឹងសំណួរអំពីថា តើការវាយប្រហារបានប៉ះពាល់ ដល់ស្ថិរភាពយុទ្ធសាស្ត្រ ឬយ៉ាងណាថា “ឧបករណ៍ ដូចដែលបានបញ្ជាក់ដោយក្រសួងការពារជាតិ មិនត្រូវបានបំផ្លាញទេ ប៉ុន្តែត្រូវបានខូចខាត ។ វានឹងត្រូវស្តារឡើងវិញ” ។
លោកបានអះអាងថា ការអះអាងរបស់ក្រុង កៀវ អំពីលទ្ធផល នៃការវាយប្រហារមិនស្របគ្នា ហើយថា “មិនមានអ្វីសូម្បី តែចូលមកជិត” ទៅនឹងកម្រិត នៃការខូចខាតដែលដកស្រង់ ដោយទីក្រុងគៀវ ដោយជំរុញឱ្យអ្នកសារព័ត៌មាន ពឹងផ្អែកតែលើព័ត៌មាន ដែលបានចែករំលែក តាមរយៈបណ្តាញ ផ្លូវការរបស់ក្រសួង ការពារជាតិ រុស្ស៊ីប៉ុណ្ណោះ៕
ប្រែសម្រួលៈ ណៃ តុលា
