សភាអ៊ឺរ៉ុប បោះឆ្នោតអនុញ្ញាត ឱ្យរដ្ឋជាសមាជិក សហភាពអឺរ៉ុប បាញ់ទម្លាក់យន្តហោះរបស់រុស្ស៊ី
បរទេស៖ សភាអ៊ឺរ៉ុបបានអនុម័តដំណោះស្រាយ មិនជាប់កាតព្វកិច្ចដោយអំពាវនាវ ឱ្យរដ្ឋជាសមាជិកសហភាពអឺរ៉ុប បាញ់ទម្លាក់យន្តហោះរបស់រុស្ស៊ី ដែលហោះចូលក្នុងដែន អាកាសរបស់ប្លុកនេះ។ ការផ្លាស់ប្តូរនេះធ្វើឡើង បន្ទាប់ពីមានការមើលឃើញ យន្តហោះគ្មានមនុស្សបើក នាពេលថ្មីៗនេះនៅទូទាំងទ្វីបអឺរ៉ុប ដែលមន្ត្រីលោកខាងលិច បានភ្ជាប់ទំនាក់ទំនងជាមួយទីក្រុងម៉ូស្គូ។ រុស្ស៊ីបានថ្កោលទោសការចោទប្រកាន់នេះថា គ្មានមូលដ្ឋាន និងបានចង្អុលទៅការខ្វះភស្តុតាង។
យោងតាមសារព័ត៌មាន RT ចេញផ្សាយ នៅថ្ងៃទី៩ ខែតុលា ឆ្នាំ២០២៥ បានឱ្យដឹងថា ដំណោះស្រាយដែលបាន ណែនាំកាលពីដើមសប្តាហ៍នេះ ធ្វើឡើងបន្ទាប់ពីរបាយការណ៍ជាច្រើន នៃយន្តហោះគ្មានមនុស្សបើកដែលមិន ស្គាល់អត្តសញ្ញាណហោះនៅ ជិតអាកាសយានដ្ឋាន និងទីតាំងយោធា ជំរុញឱ្យសមាជិកសហភាពអឺរ៉ុបចាត់វិធានការ “សម្របសម្រួល រួបរួម ប្រឆាំងនឹង ការរំលោភលើដែនអាកាសរបស់ពួកគេ រួមទាំងការបាញ់ទម្លាក់ការ គំរាមកំហែងតាមអាកាស” ផងដែរ ។
អឺរ៉ុបក៏ “ថ្កោលទោសយ៉ាងដាច់អហង្ការ ចំពោះសកម្មភាពដែល មិនប្រុងប្រយ័ត្ន និងបង្កើនការបំពានដែនអាកាសរបស់រុស្ស៊ី” របស់សមាជិកសហភាពអឺរ៉ុប និងអង្គការណាតូ ប៉ូឡូញ អេស្តូនី ឡាតវី លីទុយអានី និងរូម៉ានី និងអ្វីដែលខ្លួនពណ៌នាថាជា “ការលុកលុយដោយយន្តហោះគ្មានមនុស្សបើក” នៅក្នុងប្រទេសដាណឺម៉ាក ស៊ុយអែត និងន័រវេស។
ចំណែករុស្ស៊ីវិញបានហៅការចោទ ប្រកាន់ម្តងហើយម្តងទៀតនេះថា គ្មានមូលដ្ឋាន ហើយបានសង្កត់ធ្ងន់ថា គ្មានភស្តុតាងណាមួយត្រូវបានបង្ហាញ ដែលភ្ជាប់យន្តហោះគ្មានមនុស្សបើក ទៅកាន់ប្រទេសរុស្ស៊ីនោះទេ។ នាយករដ្ឋមន្ត្រីហូឡង់ លោក Dick Schoof ក៏បានអះអាង កាលពីថ្ងៃអង្គារថា សហភាពអឺរ៉ុបមិនមានភស្តុតាង នៃការជាប់ពាក់ព័ន្ធរបស់រុស្ស៊ី ក្នុងការមើលឃើញយន្តហោះ គ្មានមនុស្សបើកនោះដែរ៕
