ខណៈដែលជម្លោះនៅមជ្ឈិមបូព៌ាកាន់តែរីករាលដាល សហរដ្ឋអាមេរិកថា ការវាយប្រហារលើអ៊ីរ៉ង់នឹងអូសបន្លាយពេល ហើយនឹងកាន់តែខ្លាំងឡើង
បរទេស៖ ការវាយប្រហារតាមអាកាសរបស់អ៊ីស្រាអែល និងសហរដ្ឋអាមេរិក បានវាយប្រហារអ៊ីរ៉ង់នៅក្នុងយុទ្ធនាការកាន់តែខ្លាំងឡើង ដែលប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃចន្ទថា ទំនងជាចំណាយពេលច្រើនសប្តាហ៍។ ទីក្រុងតេហេរ៉ង់ និងសម្ព័ន្ធមិត្តរបស់ខ្លួនបានសងសឹកនៅទូទាំងតំបន់ ដោយវាយប្រហារអ៊ីស្រាអែល និងគោលដៅជាច្រើននៅក្នុងរដ្ឋឈូងសមុទ្រ រួមទាំងរោងចក្រថាមពលនៅកាតា និងស្ថានទូតអាមេរិកនៅអារ៉ាប៊ីសាអូឌីត។
យោងតាមសារព័ត៌មាន AP ចេញផ្សាយនៅថ្ងៃទី៣ ខែមីនា ឆ្នាំ២០២៦ថា កម្រិតនៃការវាយប្រហារ ការសម្លាប់មេដឹកនាំកំពូលអ៊ីរ៉ង់ លោក អាយ៉ាតូឡា អាលី ខាមេនី និងកង្វះផែនការចាកចេញណាមួយដែលច្បាស់លាស់ បានរៀបចំឆាកសម្រាប់ជម្លោះដ៏យូរអង្វែងជាមួយនឹងផលវិបាកដ៏ធំធេង។ កន្លែងដែលចាត់ទុកថាជាឋានសួគ៌សុវត្ថិភាពនៅមជ្ឈិមបូព៌ាដូចជាទីក្រុងឌូបៃ គេបានឃើញអគ្គីភ័យកំពុងឆាបឆេះ។ តម្លៃថាមពលកើនឡើង ហើយសម្ព័ន្ធមិត្តអាមេរិកបានសន្យាថា នឹងជួយបញ្ឈប់មីស៊ីល និងយន្តហោះគ្មានមនុស្សបើករបស់អ៊ីរ៉ង់។
លោក ត្រាំ បាននិយាយថា ប្រតិបត្តិការទំនងជានឹងមានរយៈពេលពីបួនទៅប្រាំសប្តាហ៍ ប៉ុន្តែលោកបានត្រៀមខ្លួនរួចជាស្រេច «សម្រាប់រយៈពេលយូរជាងនេះ»។
នៅពេលដែលជម្លោះកាន់តែរីករាលដាល ក្រសួងការបរទេសអាមេរិក បានជំរុញឱ្យពលរដ្ឋអាមេរិកចាកចេញពីប្រទេសជាច្រើននៅតំបន់មជ្ឈិមបូព៌ា ដោយសារតែហានិភ័យសុវត្ថិភាព៕
ប្រែសម្រួលៈ ណៃ តុលា
