កសិករនៅភាគខាងកើតប្រទេសថៃ ងាកទៅរកវិធីសាស្រ្តប្រពៃណីនៃការភ្ជួររាស់ដីដោយប្រើក្របី ក្នុងពេលតម្លៃប្រេងឥន្ធនៈកើនឡើង
បរទេស៖ កសិករនៅភាគខាងកើតប្រទេសថៃកំពុងងាកទៅរកវិធីសាស្រ្តប្រពៃណីនៃការភ្ជួររាស់ដីជាមួយក្របី ខណៈដែលតម្លៃប្រេងឥន្ធនៈកើនឡើងធ្វើឱ្យថ្លៃដើមកសិកម្មកើនឡើង ដែលផ្តល់នូវជម្រើសដែលមានតម្លៃទាបជាងគ្រឿងចក្រ។
យោងតាមសារព័ត៌មាន Khaosod English ចេញផ្សាយនៅថ្ងៃទី៨ ខែមេសា ឆ្នាំ២០២៦ថា នៅក្នុងស្រុក Khlong Luang Phaeng ក្នុងខេត្ត Chachoengsao អ្នកស្រុកម្នាក់បានទាក់ទាញចំណាប់អារម្មណ៍បន្ទាប់ពីផ្តល់ជូនក្របីសម្រាប់ជួលដល់កសិករដែលកំពុងស្វែងរកការកាត់បន្ថយការចំណាយលើប្រេងឥន្ធនៈ។
អ្នកស្រី Wannanee Pluemsomboon អាយុ 51 ឆ្នាំ បាននិយាយថា អ្នកស្រីបានចិញ្ចឹមក្របីអស់ជាច្រើនជំនាន់មកហើយ ហើយថ្មីៗនេះបានឃើញតម្រូវការកើនឡើងពីកសិករដែលកំពុងស្វែងរកការជំនួសឧបករណ៍ដែលដំណើរការដោយប្រេងឥន្ធនៈ។ តម្លៃជួលមានចាប់ពី ៥.០០០បាត ទៅ ៦.០០០ បាតក្នុងមួយខែ អាស្រ័យលើទំហំដី ដោយថ្លៃដឹកជញ្ជូនត្រូវបានចរចាដាច់ដោយឡែកពីគ្នា។
ការផ្លាស់ប្តូរនេះឆ្លុះបញ្ចាំងពីកិច្ចខិតខំប្រឹងប្រែងកាន់តែទូលំទូលាយរបស់កសិករក្នុងការសម្របខ្លួនទៅនឹងការកើនឡើងជាបន្តបន្ទាប់នៃតម្លៃប្រេងឥន្ធនៈ ដែលបានប៉ះពាល់ដល់វិស័យជាច្រើននៃសេដ្ឋកិច្ច រួមទាំងការដឹកជញ្ជូន និងកសិកម្ម៕
ប្រែសម្រួលៈ ណៃ តុលា
