ចិន បញ្ជាក់ពីការត្រៀមខ្លួន ដើម្បីដើរតួនាទីស្ថាបនាដល់ការស្តារសន្តិភាព និងភាពស្ងប់ស្ងាត់នៅក្នុងតំបន់ឈូងសមុទ្រ
ប៉េកាំង៖ នាយករដ្ឋមន្ត្រីចិន លោក លី ឈៀង បានឧ្យដឹងថា ប្រទេសចិន បានត្រៀមខ្លួនរួចជាស្រេច ដើម្បីដើរតួនាទីស្ថាបនាបន្ថែមទៀត និងចូលរួមចំណែកដល់ការស្តារសន្តិភាព និងភាពស្ងប់ស្ងាត់នៅក្នុងតំបន់ឈូងសមុទ្រ។
លោក លី បានធ្វើការកត់សម្គាល់នេះ នៅពេលជួបពិភាក្សាជាមួយព្រះអង្គម្ចាស់ Sheikh Khaled bin Mohamed bin Zayed Al Nahyan ព្រះអង្គម្ចាស់រាជទាយាទនៃទីក្រុងអាប៊ូដាប៊ី ប្រទេសអេមីរ៉ាតអារ៉ាប់រួម (UAE) នៅទីក្រុងប៉េកាំង។
លោកបានកត់សម្គាល់ថា ចាប់តាំងពីជម្លោះនៅអ៊ីរ៉ង់ បានផ្ទុះឡើង ប្រទេសចិនបានទំនាក់ទំនងយ៉ាងជិតស្និទ្ធជាមួយភាគីពាក់ព័ន្ធ និងប្តេជ្ញាចិត្តយ៉ាងសកម្មក្នុងការលើកកម្ពស់សន្តិភាព និងបញ្ចប់សង្គ្រាម។
លោកសង្ឃឹមថា អារ៉ាប់រួមនឹងបន្តចាត់វិធានការប្រកបដោយប្រសិទ្ធភាព ដើម្បីធានាសុវត្ថិភាពរបស់ពលរដ្ឋ ស្ថាប័ន និងគម្រោងចិននៅក្នុងប្រទេស។
ដោយកត់សម្គាល់ថា ប្រទេសចិន និងអារ៉ាប់រួម គឺជាដៃគូយុទ្ធសាស្ត្រដ៏ទូលំទូលាយ លោកបានលេីកឡេីងថា ប្រទេសទាំងពីរមានមិត្តភាពប្រពៃណីដ៏ជ្រាលជ្រៅ និងបានគាំទ្រគ្នាទៅវិញទៅមកជាយូរមកហើយលើបញ្ហាទាក់ទងនឹងផលប្រយោជន៍ស្នូលរបស់គ្នាទៅវិញទៅមក។
លោកបានបន្ថែមថា ក្នុងប៉ុន្មានឆ្នាំថ្មីៗនេះ ក្រោមការណែនាំជាយុទ្ធសាស្ត្ររបស់ប្រមុខរដ្ឋទាំងពីរ ទំនាក់ទំនងចិន-អារ៉ាប់រួម បានបន្តពង្រឹង និងអភិវឌ្ឍ ហើយកិច្ចសហប្រតិបត្តិការក្នុងវិស័យផ្សេងៗ សម្រេចបានលទ្ធផលផ្លែផ្កា ដែលនាំមកនូវអត្ថប្រយោជន៍ជាក់ស្តែងដល់ប្រជាជននៃប្រទេសទាំងពីរ។
លោកបានបន្ថែមថា ប្រទេសចិនមានឆន្ទៈបន្តដើររួមគ្នាជាមួយអារ៉ាប់រួមលើមាគ៌ានៃការអភិវឌ្ឍរួមគ្នា បង្កើនការទំនាក់ទំនង និងការសម្របសម្រួល ពង្រឹងទំនុកចិត្តគ្នាទៅវិញទៅមកខាងនយោបាយ និងលើកកម្ពស់ទំនាក់ទំនង និងកិច្ចសហប្រតិបត្តិការរវាងចិន និងអារ៉ាប់រួមឲ្យឈានដល់កម្រិតថ្មីជាបន្តបន្ទាប់៕
ប្រែសម្រួល ឈូក បូរ៉ា
