គុយបា ព្រមានថា ការវាយប្រហារដោយយោធារបស់សហរដ្ឋអាមេរិក នឹងបង្កឱ្យមានការបង្ហូរឈាមដ៏អាក្រក់
ហាវ៉ាណា៖ ការវាយប្រហារដោយយោធាណាមួយរបស់សហរដ្ឋអាមេរិកលើប្រទេសគុយបា នឹងបង្កឱ្យមាន “ការបង្ហូរឈាមដែលមានផលវិបាក ដែលមិនអាចគណនាបាន” និងផលប៉ះពាល់យ៉ាងធ្ងន់ធ្ងរដល់សន្តិភាព និងស្ថិរភាពនៅអាមេរិកឡាទីន និងតំបន់ការ៉ាប៊ីន នេះបើយោងតាមការព្រមានរបស់ប្រធានាធិបតីគុយបាលោក Miguel Diaz-Canel។
លោក Diaz-Canel បានសរសេរនៅលើបណ្ដាញសង្គម X ឧ្យដឹងថា “ការគំរាមកំហែងនៃការឈ្លានពានផ្នែកយោធាប្រឆាំងនឹងប្រទេសគុយបា ដោយប្រទេសដ៏មានអំណាចបំផុតរបស់ពិភពលោកត្រូវបានគេស្គាល់យ៉ាងច្បាស់។ ការគំរាមកំហែងបែបនេះបង្កើតបានជាឧក្រិដ្ឋកម្មអន្តរជាតិរួចហើយ”។
លោកបានលេីកឡេីងថា ប្រទេសគុយបា “មិនតំណាងឱ្យការគំរាមកំហែងនោះទេ ហើយក៏មិនមានផែនការ ឬចេតនាឈ្លានពានប្រឆាំងនឹងប្រទេសណាមួយដែរ” ដោយបន្ថែមថារឿងនេះត្រូវបានគេស្គាល់យ៉ាងច្បាស់ដោយរដ្ឋាភិបាលសហរដ្ឋអាមេរិក ជាពិសេសដោយទីភ្នាក់ងារការពារជាតិ និងសន្តិសុខជាតិរបស់ខ្លួន។
លោក Diaz-Canel បានបន្ចថា ប្រទេសគុយបា កំពុងរងទុក្ខរួចទៅហើយដោយ “ការឈ្លានពានពហុវិមាត្រ” ដោយសហរដ្ឋអាមេរិក ហើយមាន “សិទ្ធិដាច់ខាត និងស្របច្បាប់” ដើម្បីការពារខ្លួនពីសកម្មភាពយោធាណាមួយ។
ការកត់សម្គាល់របស់លោក បានកើតឡើងបន្ទាប់ពីសារព័ត៌មានអាមេរិក Axios បានរាយការណ៍កាលពីថ្ងៃអាទិត្យថា ប្រទេសគុយបា បានទទួលយន្តហោះគ្មានមនុស្សបើកយោធាជាង ៣០០ គ្រឿង ហើយបានវាយតម្លៃសេណារីយ៉ូ ដែលអាចធ្វើទៅបានសម្រាប់ការប្រើប្រាស់របស់ពួកគេប្រឆាំងនឹងគោលដៅរបស់សហរដ្ឋអាមេរិក៕
ប្រែសម្រួល ឈូក បូរ៉ា
