ប៉ូឡូញ បង្ហាញនាវាចម្បាំងហ្វ្រីហ្គេតដំបូងក្រោមកម្មវិធីទំនើបកម្មកងទ័ពជើងទឹកដ៏សំខាន់របស់ខ្លួន
បរទេស៖ ប្រទេសប៉ូឡូញនៅថ្ងៃពុធនេះ បានរៀបចំពិធីបង្ហាញនាវាចម្បាំង ORP Wicher ដែលជានាវាចម្បាំងពហុតួនាទីដំបូងគេក្នុងចំណោមនាវាចម្បាំងបីគ្រឿងដែលកំពុងត្រូវបានសាងសង់ក្រោមកម្មវិធីទំនើបកម្មកងទ័ពជើងទឹក Miecznik នេះបើយោងតាមការចុះផ្សាយរបស់ទីភ្នាក់ងារសារព័ត៌មានប៉ូឡូញ។
ពិធីនេះនៅឯកន្លែងផលិតនាវាចម្បាំង PGZ ក្នុងទីក្រុង Gdynia ភាគខាងជើង មានការចូលរួមពីប្រធានាធិបតីប៉ូឡូញលោក Karol Nawrocki និងនាយករដ្ឋមន្ត្រីលោក Donald Tusk។
លោក Nawrocki បានពិពណ៌នាអំពីកម្មវិធី Miecznik ថាជាព្រឹត្តិការណ៍សំខាន់មួយក្នុងការធ្វើទំនើបកម្មកងទ័ពជើងទឹកប៉ូឡូញ ហើយបានលេីកឡេីងថា នាវា Wicher នឹងពង្រឹងកងកម្លាំងកងទ័ពជើងទឹករបស់ប្រទេសយ៉ាងសំខាន់។
កម្មវិធីនេះគឺជាកិច្ចខិតខំប្រឹងប្រែងធ្វើទំនើបកម្មកងទ័ពជើងទឹកដ៏ធំបំផុតរបស់ប្រទេសប៉ូឡូញ ដែលមានបំណងផ្តល់នាវាចម្បាំងទំនើបៗចំនួនបីគ្រឿងដើម្បីជំនួសនាវាចម្បាំងថ្នាក់ Oliver Hazard Perry ចាស់ៗរបស់កងនាវា។
នាវាចម្បាំងថ្មីទាំងនេះត្រូវបានរចនាឡើងដើម្បីទប់ទល់នឹងការគំរាមកំហែងនៅលើអាកាស នៅលើ និងក្រោមទឹក ខណៈពេលដែលក៏ការពារផ្លូវដឹកជញ្ជូន និងហេដ្ឋារចនាសម្ព័ន្ធសំខាន់ៗផងដែរ៕
ប្រែសម្រួល ឈូក បូរ៉ា
