ទស្សនាវដ្តី«Qiushi»ចុះផ្សាយអត្ថបទសំខាន់របស់លោក Xi Jinping ក្រោមចំណងជើង «លើកកម្ពស់សមត្ថភាពបង្ការ កាត់បន្ថយ និងជួយសង្គ្រោះគ្រោះមហន្តរាយ»
ទស្សនាវដ្តី «Qiushi» លើកទី១៦ ដែលនឹងបោះពុម្ភផ្សាយនៅថ្ងៃទី១៦ ខែសីហានឹងចុះផ្សាយអត្ថបទសំខាន់របស់លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិនប្រធានរដ្ឋចិន និងជាប្រធានគណៈកម្មាធិការយោធាមជ្ឈិមចិនក្រោមចំណងជើង«លើកកម្ពស់សមត្ថភាពបង្ការ កាត់បន្ថយ និងជួយសង្គ្រោះគ្រោះមហន្តរាយ»។
អត្ថបទបានគូសបញ្ជាក់ថា ប្រទេសចិនមានទឹកដីធំល្វឹងល្វើយ ភូមិសាស្ត្រដ៏ស្មុគស្មាញ អាកាសធាតុចម្រុះបែប ដែលធ្វើឱ្យគ្រោះមហន្តរាយធម្មជាតិកើតឡើងជាញឹកញាប់។ ចាប់ពីសមាជបក្សកុម្មុយនីស្តចិនលើកទី១៨មក គណៈកម្មាធិការមជ្ឈិមបក្សកុម្មុយនីស្តចិនបានចាត់ទុកការងារបង្ការ កាត់បន្ថយ និងជួយសង្គ្រោះគ្រោះមហន្តរាយជាការងារសំខាន់ដែលពាក់ព័ន្ធនឹងសុវត្ថិភាពរបស់ប្រជាជន និងសន្តិសុខជាតិ ហើយបានដឹកនាំកម្មាភិបាល និងប្រជាជនឲ្យយកឈ្នះលើគ្រោះមហន្តរាយធម្មជាតិធំៗជាបន្តបន្ទាប់ ដោយកាត់បន្ថយចំនួនអ្នកស្លាប់បាត់ជីវិតនិងរបួស និងការខូចខាតទ្រព្យសម្បត្តិ សមិទ្ធផលទាំងនេះត្រូវបានទទួលស្គាល់ទូទាំងពិភពលោក។
អត្ថបទបានបង្ហាញថា បច្ចុប្បន្ន ការងារបង្ការ កាត់បន្ថយនិងជួយសង្គ្រោះគ្រោះមហន្តរាយប្រឈមមុខនឹងសភាពការណ៍ថ្មីនិងបញ្ហាថ្មីជាច្រើន។ត្រូវជំរុញឱ្យការគ្រប់គ្រងគ្រោះមហន្តរាយផ្លាស់ប្តូរឆ្ពោះទៅរកការបង្ការមុនពេលមានគ្រោះមហន្តរាយ ត្រូវលើកម្ពស់សមត្ថភាពក្នុងការឆ្លើយតប និងដោះស្រាយគ្រោះមហន្តរាយធំៗ ត្រូវពង្រឹងការគាំទ្រខាងបច្ចេកវិទ្យានិងការធានាខាងច្បាប់ ត្រូវពង្រឹងមូលដ្ឋានគ្រឹះសម្រាប់ការបង្ការ កាត់បន្ថយនិងជួយសង្គ្រោះគ្រោះមហន្តរាយ ត្រូវធានាការអនុវត្តទំនួលខុសត្រូវយ៉ាងម៉ឺងម៉ាត់ ត្រូវតែពង្រឹងការអប់រំនិងការបណ្តុះបណ្តាល ដើម្បីផ្តោតសំខាន់ទៅលើការលើកកម្ពស់សមត្ថភាពបង្ការ កាត់បន្ថយនិងជួយសង្គ្រោះគ្រោះមហន្តរាយរបស់កម្មាភិបាលគ្រប់ជាន់ថ្នាក់៕
