វៀតណាម សម្រេចកាត់បន្ថយពន្ធលើប្រាក់ចំណូល ៣០ ភាគរយសម្រាប់អាជីវកម្មខ្នាតតូចក្នុងឆ្នាំ ២០២៦-២៧
បរទេស៖ កាលពីថ្ងៃចន្ទ រដ្ឋសភាបានអនុម័តសេចក្តីសម្រេចមួយស្តីពីការកាត់បន្ថយពន្ធលើប្រាក់ចំណូលចំនួន ៣០ ភាគរយសម្រាប់បុគ្គល និងអាជីវកម្មដែលមានប្រាក់ចំណូលប្រចាំឆ្នាំមិនលើសពី ១០ ពាន់លានដុង ឬប្រហែល ៣៨០.០០០ ដុល្លារអាមេរិក ក្នុងឆ្នាំ ២០២៦ និង ឆ្នាំ២០២៧ ក្នុងចលនាមួយដើម្បីគាំទ្រដល់អាជីវកម្មខ្នាតតូច។
យោងតាមសារព័ត៌មាន Vietnam News ចេញផ្សាយកាលពីថ្ងៃទី២៤ ខែសីហា ឆ្នាំ២០២៦ថា សេចក្តីសម្រេចនេះចូលជាធរមានភ្លាមៗ ហើយអនុវត្តចំពោះឆ្នាំពន្ធឆ្នាំ ២០២៦ និង ឆ្នាំ២០២៧។
បុគ្គលដែលមានប្រាក់ចំណូលអាជីវកម្មប្រចាំឆ្នាំមិនលើសពី ១០ ពាន់លានដុងក្នុងរយៈពេលពីរឆ្នាំនីមួយៗនឹងទទួលបានការកាត់បន្ថយពន្ធលើប្រាក់ចំណូលផ្ទាល់ខ្លួនចំនួន ៣០ ភាគរយ។
សហគ្រាស និងអង្គការដែលមានប្រាក់ចំណូលប្រចាំឆ្នាំមិនលើសពី ១០ ពាន់លានដុងក៏នឹងមានសិទ្ធិទទួលបានការកាត់បន្ថយពន្ធលើប្រាក់ចំណូលសាជីវកម្មចំនួន ៣០ ភាគរយសម្រាប់ឆ្នាំ ២០២៦ និង ឆ្នាំ២០២៧ ផងដែរ។
ការកាត់បន្ថយពន្ធនឹងមិនអនុវត្តចំពោះអាជីវកម្មដែលបង្កើតឡើងតាមរយៈការបែងចែក ឬការបំបែកចេញពីក្រុមហ៊ុនមួយបន្ទាប់ពីថ្ងៃទី ២៤ ខែសីហាទេ ប្រសិនបើប្រាក់ចំណូលប្រចាំឆ្នាំរួមបញ្ចូលគ្នារបស់អង្គភាពដែលទើបបង្កើតថ្មីលើសពី ១០ ពាន់លានដុង។
ចំពោះអាជីវកម្មដែលមានសិទ្ធិទទួលបានការលើកទឹកចិត្តផ្នែកពន្ធដាររួចហើយ ក្រោមច្បាប់ស្តីពីពន្ធលើប្រាក់ចំណូលសាជីវកម្ម ឬច្បាប់ផ្សេងទៀត និងសេចក្តីសម្រេចរបស់រដ្ឋសភា ការកាត់បន្ថយ ៣០ ភាគរយនឹងត្រូវបានគណនាលើពន្ធលើប្រាក់ចំណូលសាជីវកម្មដែលត្រូវបង់ បន្ទាប់ពីការលើកទឹកចិត្តផ្នែកពន្ធដារដែលមានស្រាប់ត្រូវបានកាត់ចេញ។
ប្រែសម្រួលៈ ណៃ តុលា
