ប្រធានាធិបតីចិន ថ្លែងនៅពេលមកដល់កៀហ្ស៊ីស៊ីស្ថានថា កិច្ចសហប្រតិបត្តិការចិន-កៀហ្ស៊ីស៊ីស្ថាន បាននាំមកនូវ “រយៈពេលមាស” នៃការអភិវឌ្ឍយ៉ាងឆាប់រហ័ស
បរទេស៖ ប្រធានាធិបតីចិន ស៊ី ជីនពីង បានធ្វើដំណើរ ទៅដល់ទីក្រុងប៊ីស្គេក ប្រទេស កៀហ្ស៊ីស៊ីស្ថាន កាលពីថ្ងៃអាទិត្យ សម្រាប់ដំណើរទស្សនកិច្ចផ្លូវរដ្ឋ ទៅកាន់ប្រទេសកៀហ្ស៊ីស៊ីស្ថាន និងកិច្ចប្រជុំកំពូលអង្គការសហប្រតិបត្តិការសៀងហៃ (SCO) ឆ្នាំ២០២៦។
យោងតាមទីភ្នាក់ងារព័ត៌មានចិន ស៊ិនហួ ចេញផ្សាយ កាលពីថ្ងៃទី៣០ ខែសីហា ឆ្នាំ២០២៦ថា លោក ស៊ី បានថ្លែងនៅក្នុងសុន្ទរកថា នៅពេលលោកមកដល់ថា កិច្ចសហប្រតិបត្តិការចិន-កៀហ្ស៊ីស៊ីស្ថាន បាននាំមកនូវ “រយៈពេលមាស” នៃការអភិវឌ្ឍយ៉ាងឆាប់រហ័ស។
ដោយកត់សម្គាល់ថា ប្រទេសចិន និង កៀហ្ស៊ីស៊ីស្ថានចែករំលែកមិត្តភាពប្រពៃណីដ៏យូរអង្វែង លោក ស៊ី បានមានប្រសាសន៍ថា ភ្នំធានសានដ៏អស្ចារ្យឈរជាសាក្សី នៃការផ្លាស់ប្តូរមិត្តភាពរាប់ពាន់ឆ្នាំរវាងប្រជាជនរបស់ពួកគេ។
ក្នុងរយៈពេល ៣៤ ឆ្នាំចាប់តាំង ពីការបង្កើតទំនាក់ទំនងការទូត ទំនាក់ទំនងចិន-កៀហ្ស៊ីស៊ីស្ថាន បានទប់ទល់នឹងការសាកល្បង នៃទេសភាពអន្តរជាតិ ដែលកំពុងផ្លាស់ប្តូរ រក្សាការអភិវឌ្ឍដ៏រឹងមាំ និងស្ថិរភាពពេញមួយជីវិត និងឈានដល់កម្រិតខ្ពស់ នៃភាពជាដៃគូយុទ្ធសាស្ត្រដ៏ទូលំទូលាយសម្រាប់យុគសម័យថ្មីមួយ លោក ស៊ី បានមានប្រសាសន៍ថា។
លោក ស៊ី បានមានប្រសាសន៍ថា ក្នុងរយៈពេលប៉ុន្មានឆ្នាំចុងក្រោយនេះ ទំហំពាណិជ្ជកម្មទ្វេភាគី និងការផ្លាស់ប្តូរប្រជាជន បានឈានដល់កម្រិតខ្ពស់ថ្មី ដោយកត់សម្គាល់ថា គម្រោងធំៗ រួមទាំងផ្លូវដែកចិន-កៀហ្ស៊ីស៊ីស្ថាន-អ៊ូសបេគីស្ថាន ត្រូវបានអនុវត្ត ដោយជោគជ័យ ហើយលទ្ធផលជាក់ស្តែង នៃកិច្ចសហប្រតិបត្តិការ ដែលផ្តល់ផលប្រយោជន៍ទៅវិញទៅមក បានផ្តល់ផលប្រយោជន៍យ៉ាងទូលំទូលាយ ដល់ប្រជាជនទាំងពីរ។
ប្រែសម្រួលៈ ណៃ តុលា
