រលកនៃការលក់បណ្ណបំណុល ជាសកលកាន់តែធ្ងន់ធ្ងរ រុញច្រានអត្រាការប្រាក់ បណ្ណបំណុលអាមេរិកឡើង ដល់កម្រិតខ្ពស់បំផុត ក្នុងរយៈពេល ២៤ឆ្នាំ
បរទេស៖ ទីផ្សារបណ្ណបំណុល ជាសកលបានរងសម្ពាធ នៃការលក់យ៉ាងខ្លាំងជាថ្មីម្តងទៀត ដែលរុញច្រានថ្លៃដើម នៃការខ្ចីប្រាក់ (Borrowing Costs) ចាប់ពីសហរដ្ឋអាមេរិក បារាំង រហូតដល់ជប៉ុន ឱ្យឡើងដល់កម្រិតខ្ពស់បំផុត ក្នុងរយៈពេលរាប់សិបឆ្នាំ និងបង្កើនការព្រួយបារម្ភកាន់តែខ្លាំង សម្រាប់អ្នកបង្កើតគោលនយោបាយសេដ្ឋកិច្ច។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters ថ្ងៃទី២ ខែតុលា ឆ្នាំ២០២៦។
អត្រាការប្រាក់ហក់ឡើងខ្ពស់បំផុត មិនធ្លាប់មានក្នុងសតវត្សរ៍នេះ៖ អត្រាការប្រាក់នៃបណ្ណបំណុលរតនាគារ អាមេរិករយៈពេល ១០ឆ្នាំ (US 10-year Treasury yield) ដែលជាសូចនាករគោលសម្រាប់វាស់វែងថ្លៃ ដើមនៃការខ្ចីប្រាក់ទូទាំងពិភពលោក បានហក់ឡើងដល់ ៥,៣៤% ដែលជាកម្រិតខ្ពស់បំផុតគិតចាប់តាំងពីឆ្នាំ២០០២ មក បន្ទាប់ពីបានកត់ត្រាការកើនឡើងប្រចាំត្រីមាស (ត្រីមាសទី៣ បញ្ចប់ក្នុងខែកញ្ញា) ខ្ពស់បំផុតក្នុងសតវត្សរ៍នេះ។ ក្រោយមក អត្រានេះបានថមថយមកវិញនៅត្រឹមប្រមាណ ៥,២៦% បន្ទាប់ពីមានការចូលទិញប៉ះប៉ូវពីវិនិយោគិនមួយចំនួន។
មូលហេតុចម្បងដែលរុញច្រានតម្លៃឱ្យធ្លាក់ចុះ និងការប្រាក់ហក់ឡើង ការហក់ឡើងនៃថ្លៃថាមពលនិងប្រេងឥន្ធនៈ ដែលកំពុងជំរុញឱ្យអតិផរណាបន្តស្ថិតក្នុងកម្រិតខ្ពស់។ កំណើនយ៉ាងគំហុកនៃវិស័យបញ្ញាសិប្បនិម្មិត (AI) និងការសាងសង់មជ្ឈមណ្ឌលទិន្នន័យ ដែលបង្កើនការប្រកួតប្រជែងដណ្តើមទុនវិនិយោគ និងបង្កើនការរំពឹងទុកលើកំណើនសេដ្ឋកិច្ច ក៏ដូចជាអត្រាការប្រាក់រយៈពេលខ្លី។
ផលប៉ះពាល់ជាខ្សែសង្វាក់លើសេដ្ឋកិច្ចពិត អត្រាការប្រាក់បណ្ណបំណុលឡើងខ្ពស់ បង្ខំឱ្យក្រុមហ៊ុននានា និងពលរដ្ឋដែលខ្ចីប្រាក់ទិញផ្ទះ (Mortgages) ត្រូវចំណាយលើថ្លៃការប្រាក់ខ្ពស់ជាងមុន ព្រមទាំងដាក់បន្ទុកលើរដ្ឋាភិបាលឱ្យចំណាយថវិកាកាន់តែច្រើនសន្ធឹកសន្ធាប់លើការសងការប្រាក់បំណុលជាតិ។
ការព្រមានអំពីស្ថានភាពសេដ្ឋកិច្ចបែបអក្សរ K (K-shaped Economy)៖ អ្នកវិភាគបានលើកឡើងថា ការរឹតបន្តឹងលក្ខខណ្ឌហិរញ្ញវត្ថុនេះអាចបង្កើនហានិភ័យនៃឱនភាពសេដ្ឋកិច្ច។ ទន្ទឹមនឹងនេះ សេដ្ឋកិច្ចកំពុងដំណើរការមិនស្មើគ្នា ដោយក្រុមអ្នកមានទ្រព្យសម្បត្តិនៅតែរីកចម្រើន ខណៈក្រុមពលរដ្ឋដែលមានចំណូលទាបកំពុងរងផលប៉ះពាល់យ៉ាងខ្លាំងពីការឡើងថ្លៃប្រេង និងទំនិញប្រើប្រាស់។
ការកើនឡើងនៃអត្រាការប្រាក់បណ្ណបំណុលនេះ បង្ហាញយ៉ាងច្បាស់ថា ទីផ្សារហិរញ្ញវត្ថុកំពុងទាមទារបុព្វលាភហានិភ័យ ខ្ពស់ជាងមុនសម្រាប់ការផ្តល់កម្ចីរយៈពេលវែង ដរាបណាវិធានការទប់ស្កាត់អតិផរណា មិនទាន់អាចគ្រប់គ្រងស្ថានការណ៍ បានពេញលេញនៅឡើយ។
ប្រែសម្រួល៖ គីរី
