កូរ៉េខាងជើង ច្រានចោលការចោទ ប្រកាន់របស់អាមេរិក ពាក់ព័ន្ធនឹងករណីលួចរូបិយប័ណ្ណគ្រីបតូ តម្លៃ ៦ ពាន់លានដុល្លារ
ព្យុងយ៉ាង៖ ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍ថា ប្រទេសកូរ៉េខាងជើង បានច្រានចោលការចោទប្រកាន់ របស់សហរដ្ឋអាមេរិក ដែលថាខ្លួនជាអ្នកនៅពីក្រោយការលួចរូបិយប័ណ្ណគ្រីបតូ ក្នុងទំហំទឹកប្រាក់ ៦ ពាន់លានដុល្លារពីវេទិកា Binance ដោយចាត់ទុកការចោទប្រកាន់នោះថាជា «វោហាសាស្ត្រគ្មានហេតុផល»។ ទីក្រុងព្យុងយ៉ាង បានឧ្យដឹងថា ការចោទប្រកាន់នេះ គឺជាភស្តុតាងបញ្ជាក់ថា ទីក្រុងវ៉ាស៊ីនតោន នៅតែបន្តមានអាកប្បកិរិយាអរិភាពចំពោះខ្លួន។
ការបដិសេធដែលចេញដោយលោកស្រី គីម យូជុង ដែលជាប្អូនស្រីដ៏មានឥទ្ធិពលរបស់មេដឹកនាំលោក គម ជុងអ៊ុន បានកើតឡើងនៅពេលដែលទីក្រុងព្យុងយ៉ាង នៅស្ងៀមមិនអើពើនឹងសំណើរបស់ប្រធានាធិបតីអាមេរិកលោក ដូណាល់ ត្រាំ ដើម្បីបន្តការទូតកិច្ចប្រជុំកំពូល។ លោកស្រី គីម យូជុង បានព្រមានថា កូរ៉េខាងជើង មានបញ្ហាដែលត្រូវពិចារណាឡើងវិញលើអ្វីដែលខ្លួនហៅថាអរិភាពរបស់សហរដ្ឋអាមេរិក។
FBI បានឧ្យដឹងកាលពីចុងសប្តាហ៍ថា កូរ៉េខាងជើង ទទួលខុសត្រូវចំពោះការលួចទ្រព្យសម្បត្តិនិម្មិតជាង 6 ពាន់លានដុល្លារពីវេទិកា Binance ដែលជាការផ្លាស់ប្តូររូបិយប័ណ្ណគ្រីបតូធំបំផុតរបស់ពិភពលោក ដែលអាចជាការលួចហិរញ្ញវត្ថុដ៏ធំបំផុតមិនធ្លាប់មាន។
KCNA បានដកស្រង់សម្តី លោកស្រី គីម យូជុង ថា “FBI កំពុងព្យាយាមដាក់ឈ្មោះ កូរ៉េខាងជើង ថាជា ‘រដ្ឋឧក្រិដ្ឋជនតាមអ៊ីនធឺណិត’ ដោយអះអាងថា ខ្លួនទទួលបានព័ត៌មានថា អង្គការលួចចូល ‘គាំទ្រ’ ដោយកូរ៉េខាងជើង មានជាប់ពាក់ព័ន្ធនឹងហេតុការណ៍នេះ”។
លោកស្រីបានលើកឡើងថា “ប៉ុន្តែការអះអាងរបស់សហរដ្ឋអាមេរិក គឺជាវោហាសាស្ត្រមិនសមហេតុផល ហើយគ្មានអ្វីថ្មីនោះទេ”។
លោកស្រីបន្ដថា “វាជាការញុះញង់នយោបាយយ៉ាងធ្ងន់ធ្ងរ ប្រឆាំងនឹងកូរ៉េខាងជើង ដែលសហរដ្ឋអាមេរិក បំភាន់មតិសាធារណៈអន្តរជាតិ ដូចជាឧក្រិដ្ឋកម្មតាមអ៊ីនធឺណិតទាំងអស់ នៅក្នុងតំបន់ផ្សេងៗគ្នា នៃពិភពលោកគឺជាទង្វើរបស់យើង”។
អ្នកជំនាញសន្តិសុខ តាមអ៊ីនធឺណិតឧ្យដឹងថា ក្រុម Hacker កូរ៉េខាងជើង ស្ថិតក្នុងចំណោមចោរលួច រូបិយប័ណ្ណឌីជីថល ដែលមានទ្រព្យសម្បត្តិច្រើនបំផុតរបស់ពិភពលោក ហើយប្រាក់ចំណូលនេះ ជួយផ្តល់មូលនិធិដល់កម្មវិធីអាវុធ របស់ប្រទេស ប៉ន្ដែកូរ៉េខាងជើង បដិសេធការចោទប្រកាន់ទាំងអស់ អំពីទំនាក់ទំនងរបស់ខ្លួនទៅនឹងការលួចរូបិយប័ណ្ណឌីជីថល និងឧក្រិដ្ឋកម្មតាមអ៊ីនធឺណិតផ្សេងទៀត៕
ប្រែសម្រួល ឈូក បូរ៉ា
