ព័ត៌មានជាតិ

ស៊ុយអែតប្ដេជ្ញា បន្តផ្តល់ហិរញ្ញប្បទាន ឥតសំណងបន្ថែមទៀត ដើម្បីអភិវឌ្ឍន៍កម្ពុជា

ភ្នំពេញ ៖ រដ្ឋាភិបាលស៊ុយអែត បានប្ដេជ្ញានឹងបន្ត ផ្តល់ហិរញ្ញប្បទានឥតសំណង សម្រាប់អនុវត្តគម្រោងអភិវឌ្ឍន៍ ជាច្រើននៅកម្ពុជា ។ នេះជាការអះអាងរបស់ លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តី ក្រសួងសេដ្ឋកិច្ចនិងហិរញ្ញវត្ថុ ក្នុងជំនួបជាមួយលោក Bjorn HAggark ឯកអគ្គរាជទូតវិសាមញ្ញ និងពេញសមត្តភាព នៃប្រទេសស៊ុយអែតប្រចាំកម្ពុជា នៅថ្ងៃទី៣០ ខែមករា ឆ្នាំ២០២០ ។

លោកបន្តថា រដ្ឋាភិបាលស៊ុយអែត បាននិងបន្តផ្តល់ហិរញ្ញប្បទានឥតសំណង សម្រាប់អនុវត្តគម្រោង អភិវឌ្ឍន៍ជាច្រើននៅកម្ពុជា ដោយភាគច្រើន ហិរញ្ញប្បទានតាមរយៈ អង្គការសហប្រជាជាតិ និងសហភាពអឺរ៉ុប ។

លោកឲ្យដឹងទៀតថា ទំនាក់ទំនង និងកិច្ចសហប្រតិបត្តិការ ប្រកបដោយផ្លែផ្ការវាងប្រទេសទាំងពីរ ត្រូវបានពង្រឹងពង្រីក ឥតឈប់ឈរ ហើយបាននាំមក នូវផលប្រយោជន៍ទៅវិញទៅមក សម្រាប់ប្រទេសទាំងពីរផងដែរ ។

ឱកាសនោះ លោក Bjorn Hlqgmark កោតសរសើរក្រសួងសេដ្ឋកិច្ច ដែលប្រមូលចំណូលចូលរដ្ឋច្រើន ហើយកើនឡើងពីមួយឆ្នាំទៅមួយឆ្នាំ ខណៈកម្ពុជាសម្រេចបាន កំណើនសេដ្ឋកិច្ចខ្ពស់ប្រកបដោយចីរភាព និងមានការអភិវឌ្ឍគួរឲ្យកត់សម្គាល់។

លោកបញ្ជាក់ថា បច្ចុប្បន្នទំហំវិនិយោគ របស់ស៊ុយអែតនៅកម្ពុជា មានបរិមាណតិចតួចនៅឡើយ ប៉ុន្តែប្រទេសទាំងពីរ មានសក្តានុពលជំរុញ កិច្ចសហប្រពិបត្តិការពាណិជ្ជកម្ម និងវិនិយោគ តាមរយៈការពង្រឹង កិច្ចសហប្រតិបន្តិការទ្វេភាគី និងបង្កើនកិច្ចសន្ទនា ជាមួយគ្នាបន្ថែម៕ ដោយ៖ធី លីថូ

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top