ភ្នំពេញ៖ ក្រោយបញ្ចប់បេសកកម្ម អ្នកជំនាញវេជ្ជសាស្រ្តចិនទាំង៧រូប ដែលជាក្រុមជំនួយដំបូង របស់ចិនចំពោះកម្ពុជា នៅថ្ងៃទី៧ ខែមេសា ឆ្នាំ២០២០នេះ បានវិលត្រឡប់ទៅកាន់ប្រទេសចិនវិញ។ ក្នុងឱកាសនោះលោក Wang Wentian ឯកអគ្គរដ្ឋទូតចិនប្រចាំកម្ពុជា, និងលោកសាស្រ្តាចារ្យ អេងហួត រដ្ឋលេខាធិការក្រសួងសុខាភិបាល បានអញ្ជើញជូនដំណើរត្រឡប់វិញនេះផងដែរ។
យោងតាមហ្វេសប៊ុកផ្លូវការ ស្ថានទូតចិន ប្រចាំកម្ពុជា នៅយប់ថ្ងៃទី៧នេះបានសរសេរថា ក្នុងដំណើរការជួយកម្ពុជា ក្នុងកិច្ចប្រយុទ្ធប្រឆាំងនឹងជំងឺវីរុស COVID-19 លើកនេះ ប្រទេសទាំងពីរបានជួយ និងយកអាសាគ្នាទៅវិញទៅមក។
លោក Wang Wentian មានប្រសាសន៍ថា អ្នកជំនាញវេជ្ជសាស្រ្តចិនដែលបានទទួលភារកិច្ចជួយកម្ពុជានាពេលនេះ បានបំពេញភារកិច្ចយ៉ាងល្អឥតខ្ចោះ ដោយស្ថិតក្រោមទឹកចិត្តនៃមិត្តភាពប្រពៃណីរវាងប្រទេសចិន និងកម្ពុជា។ ពួកគាត់បានបំពេញភារកិច្ចយ៉ាងយកចិត្តទុកដាក់ មិនធ្វេសប្រហែសនឹងបេសកកម្ម។ លោកទូតអះអាងថា ឲ្យតែជំងឺវីរុសមិនទាន់កម្ចាត់អស់ក្នុងប្រទេសកម្ពុជា ចិននៅតែមិនបញ្ឈប់ការផ្តល់ជំនួយវេជ្ជសាស្រ្តមកកម្ពុជានោះឡើយ។
ជាមួយគ្នានេះផងដែរ លោក អេងហួត រដ្ឋលេខាធិការក្រសួងសុខាភិបាលកម្ពុជា ក្នុងនាមរាជរដ្ឋាភិបាលកម្ពុជា បានថ្លែងអំណរគុណយ៉ាងជ្រាលជ្រៅ ជូនចំពោះការលះបង់ របស់ក្រុមអ្នកជំនាញវេជ្ជសាស្រ្តចិន ដែលបានខិតខំកន្លងមក។ ភាគីចិនបានចាត់ក្រុមអ្នកជំនាញ ដែលជាក្រុមជំនួយមកកាន់កម្ពុជា បានយ៉ាងទាន់ពេលវេលា ព្រមទាំងបានចែករំលែកបទពិសោធន៍ ដ៏មានតម្លៃ ក្នុងការប្រយុទ្ធប្រឆាំង ជំងឺកូវីដ១៩ មកកាន់កម្ពុជា ដែលគ្រូពេទ្យចិន បានជួយកែលម្អប្រព័ន្ធ ទប់ស្កាត់នឹងជំងឺវីរុស បានផ្តល់យោបល់ ក្នុងការព្យាបាលជូនដល់ អ្នកដែលផ្ទុកជំងឺវីរុស រួមចំណែកយ៉ាងសកម្មក្នុងការទប់ស្កាត់នឹងជំងឺ។លោកអរគុណដល់មិត្តចិន ដែលបានឈរ ជាមួយគ្នាយ៉ាងមុតមាំ ក្នុងខណៈពេល ដែលជួបការលំបាក។
