ព័ត៌មានជាតិ

លោក ឃួង ស្រេង ដឹកនាំកម្លាំងចុះតាមដាននិងអន្តរាគមន៍ ដោះស្រាយជំនន់ទឹកភ្លៀង លើផ្លូវជាតិលេខ៤ ត្រង់សាលាក្តីខ្មែរក្រហម

ភ្នំពេញ៖ ក្រោយពីមានភ្លៀងធ្លាក់ ចុះឥតស្រាកស្រាំ នៅកម្ពុជាប៉ុន្មានថ្ងៃមកនេះ បានធ្វើឲ្យភូមិសាស្ត្រមួយចំនួន ក្នុងរាជធានីភ្នំពេញ ទទួលរង នូវផលប៉ះពាល់ ដែលកើតឡើង ទៅជាជំនន់ទឹកភ្លៀង ជាក់ស្តែងកំណាត់ផ្លូវជាតិលេខ៤ ក្នុងដឹកដីខណ្ឌកំបូល និងខណ្ឌពោធិ៍សែនជ័យ ចំណុចសាលាក្តីខ្មែរក្រហមជាដើម ត្រូវបានជន់លិច ។

បញ្ហាជនលិច ដោយសារភ្លៀងធ្លាក់ខ្លាំង ប៉ុន្មានថ្ងៃជាប់គ្នានេះ រដ្ឋបាលរាជធានីភ្នំពេញ បានបន្តតាមដាន និងពិនិត្យឃើញថា ទឹកភ្លៀងជាច្រើនម៉ែត្រគូប ត្រូវបានហូរចូល មករាជធានីភ្នំពេញ ដែលមកពីភូមិសាស្ត្រ ខេត្តកំពង់ស្ពឺ ធ្លាក់មកខេត្តកណ្តាល ពោលហូរចុះមក តាមបណ្តាលផ្លូវជាតិលេខ៤តែម្តង ។

បើទោះជាយ៉ាងនេះក្តី កាលពីយប់ថ្ងៃទី២ ក៏ដូចជាបន្ត រហូតមកដល់ព្រឹកថ្ងៃទី៤ ខែតុលា ឆ្នាំ២០២០នេះ រដ្ឋបាលរាជធានីភ្នំពេញ ក្រោមការដឹកនាំ របស់លោក ឃួង ស្រេង អភិបាលរាជធានីភ្នំពេញ បានអន្តរាគមន៍ ដោយដាក់ចេញវិធានការនានា និងបានដឹកនាំកម្លាំងជំនាញ ចុះពិនិត្យនិងតាមដាន ទៅលើស្ថានភាព ចរន្តនៃការបង្ហូរទឹក ក៏ដូចជាប្រឡាយ ដែលមានលទ្ធភាព ក្នុងការដោះស្រាយបានភ្លាមៗ និងបញ្ជៀសនូវជំនន់ទឹកភ្លៀង នៅលើកំណាត់ ផ្លូវជាតិលេខ៤ ត្រង់ចំណុចសាលាក្តីខ្មែរក្រហម ឲ្យបានទាន់ពេលវេលា ។

ក្នុងដំណើរចុះពិនិត្យ ជាក់ស្តែងនេះដែរ លោកអភិបាលរាជធានីភ្នំពេញ ក៏បានសម្លឹងមើលឃើញថា ការកកស្ទះ នៃលំហូរទឹកនេះ មកពីកត្តាជាច្រើន គួបផ្សំគ្នា ដែលរដ្ឋបាលរាជធានីភ្នំពេញ ក៏ដូចជាអភិបាលខណ្ឌ បាននឹងកំពុងដោះស្រាយ យ៉ាងបន្ទាន់ តាមរយៈការកាយប្រឡាយ អោយមានមុខធំ បន្ទាប់ពីចំណុចមួយចំនួន នៅបណ្តោយមហាវិថីឈ្នះ ឈ្នះ ត្រូវបានប្រជាពលរដ្ឋ ដែលសាងសងលំនៅដ្ឋាន តាមបណ្តោយផ្លូវនេះ បិទមុខ ឬបន្សល់ទុកមុខលូតូចៗ ដែលរះស្ទះដល់ការ ហូរច្រោះរបស់ទឹកភ្លៀង ក៏ដូចជាកក់ស្ទះ ដល់លំហូរទឹកនេះតែម្តង ។ បន្ថែមពីនេះ លោកអភិបាល ក៏បានជម្រុញ ឲ្យគ្រឿងចក្រជាច្រើនគ្រឿង សម្រុកធ្វើយ៉ាងណា ស្តាប្រឡាយ កុំអោយមានការរាំងខ្ទប់ពី រុក្ខជាតិធម្មជាតិដូចជា កម្លោក និងរុក្ខជាតិវ័ល្លនានា ជាពិសេស គឺកំណកដីល្បាប់ និងសំរាម ដែលហូរអណ្តែតចូល មកក្នុងប្រឡាយតែម្តង ធ្វើយ៉ាងណា ឲ្យដំណើរការ នៃការហូរចេញ នូវជំនន់ទឹកភ្លៀង ត្រូវបានដោះស្រាយភ្លាមៗ មិនឲ្យបង្កផល់ប៉ះពាល់ យូរនិងច្រើនជាងនេះ ដល់ការធ្វើដំណើរ របស់ប្រជាពលរដ្ឋ មិនថាអ្នកទីក្រុងភ្នំពេញ និងបណ្តាលខេត្តនានា ដែលត្រូវឆ្លងកាត់ លើកំណាត់ផ្លូវជាតិលេខ៤ ត្រង់ភូមិសាស្ត្រ ខណ្ឌកំបូល និងខណ្ឌពោធិ៍សែនជ័យ ។

លោក ឃួង ស្រេង បានឲ្យដឹងថា “ក្រោយមានការអភិវឌ្ឍ ប្រទេសជាតិមានការរីកចម្រើន នៅអមសងខាងផ្លូវជាតិលេខ៤ វាក្លាយទៅជាតំបន់ ឧស្សាហកម្ម និងតំបន់សិប្បកម្ម ដែលយើងឃើញស្រាប់ហើយថា ចាប់ពីកំពង់ស្ពឺមក ចាប់ទាំងពីគីរីរម្យមក រហូតដល់រាជធានីភ្នំពេញ អមសងខាងផ្លូវក្លាយទៅជា តំបន់សេដ្ឋកិច្ចពិសេស តំបន់ឧស្សាហកម្ម និងតំបន់សិប្បកម្ម និងមានកន្លែងខ្លះ លុបស្រែអស់នេះ ប្រែក្លាយទៅជាលំនៅដ្ឋាន ដូច្នេះទឹកទាំងអស់នេះ ភ្លៀងខ្លាំងបុកមកទីក្រុងភ្នំពេញ ដោយហេតុអ្វី? ដោយហេតុថា ភូមិសាស្ត្រ ទីក្រុងភ្នំពេញ វាស្ថិតនៅតាមដងទន្លេចតុមុខ ហើយទឹកជំនន់ទឹកភ្លៀង ទឹកស្ទឹង ទឹកភ្នំ តែងតែហូរប្រសប ចាក់មកទន្លេ នេះជាក្រឹតក្រមធម្មជាតិ” ។

លោកថែមទាំងបាន បន្តទៀតថា “ទឹកហូរភ្លាមបុកខ្លាំង មកទីក្រុងភ្នំពេញ គួបផ្សំ ជាមួយនឹងប្រជាពលរដ្ឋ នៅក្នុងទីក្រុងភ្នំពេញ ក៏ធ្វើការអភិវឌ្ឍ ដីរបស់គាត់ទៅជាលំនៅដ្ឋាន ទៅជាឧស្សាហកម្ម ហើយមិនបានសហការ ជាមួយរដ្ឋបាល រាជធានីភ្នំពេញយើង ក៏ដូចជារដ្ឋបាលខណ្ឌយើង អោយបានពេញលេញ កន្លែងខ្លះ គាត់ដាក់លូតូចៗ ដូចយើងឃើញហើយថា កំពុងតែកាយនេះ គឺគាត់ដាក់លូមួយម៉ែត្រ ប៉ុន្តែចំណុចនេះ (បណ្តោយមហាវិថី ឈ្នះ ឈ្នះ) ត្រូវទុកប្រឡាយ ៨ ទៅ១០ម៉ែត្រ ដើម្បីទទួលទឹក ពីផ្លូវជាតិលេខ៤មក ។ ជាទូទៅទីក្រុងកំពុងអភិវឌ្ឍ តែងតែជួប នូវបញ្ហា ប៉ុន្តែសំខាន់ អាជ្ញាធរគ្រប់គ្រង់ នៅតែបន្តការអភិវឌ្ឍផង និងកែតម្រូវផង ធ្វើយ៉ាងណា ដើម្បីអោយប្រជាពលរដ្ឋយើង ទទួលបានផល ចេញពីការអភិវឌ្ឍ ឬទទួលបាននូវផល វិជ្ជមាន ក្រោមម្លប់សន្ថិភាព ក្រោមការដឹកនាំ របស់សម្តេចតេជោ នាយករដ្ឋមន្ត្រី នេះជាគោលការណ៍ របស់រដ្ឋបាលគ្រប់ជាន់ថ្នាក់របស់ខ្ញុំ កំពុងខិតខំធ្វើកិច្ចការងារនេះ” ។

សូមបញ្ជាក់ដែរថា គិតមកដល់ពេលបច្ចុប្បន្នេះ បញ្ហាជនលិច ដោយជំនន់ទឹកភ្លៀង ក្នុងភូមិសាស្ត្រ សាលាក្តីខ្មែរក្រហម លើកំណាត់ផ្លូវជាតិលេខ៤ ក៏មានការថមថយ ជាខ្លាំងមកវិញហើយ នៅឡើយចំណុចខ្លះ ដែលរដ្ឋបាលរាជធានីភ្នំពេញ បាននិងកំពុងដោះស្រាយ ដាក់ចេញយុទ្ធវិធីផ្សេងៗ ក្នុងការរំដោះទឹកទាំងនេះផងដែរ៕

ដោយ៖ ដារាត់

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top