ព័ត៌មានជាតិ

អាជ្ញាធរខេត្តកំពង់ស្ពឺ អំពាវនាវឱ្យពលរដ្ឋ បង្កើនការប្រុងប្រយ័ត្ន ខណៈទំនប់ចំការតែដែលជាអាងស្តុកទឹកធំមួយ បានបាក់

ភ្នំពេញ៖ លោក វី សំណាង អភិបាលខេត្តកំពង់ស្ពឺ នៅថ្ងៃទី១៣ ខែតុលា ឆ្នាំ២០២០នេះ បានអំពាវនាវសូមឱ្យប្រជាពលរដ្ឋ រស់នៅក្នុងស្រុកភ្នំស្រួច និងមួយផ្នែក នៃស្រុកសំរោងទង បង្កើនការប្រុងប្រយ័ត្ន ខណៈទំនប់ចំការតែ ដែលមានសមត្ថភាពស្តុកទឹកពី៥ទៅ៧ លានម៉ែត្រត្រីគុណ ត្រូវបានបាក់ហើយ នៅរសៀលម៉ោង ៤នេះ។

តាមរយៈបណ្ដាញសង្គមហ្វេសប៊ុកលោកអភិបាល បានសរសេរយ៉ាងដូច្នេះថា «សូមជូនដំណឹងដល់ពុកម៉ែមាមីង បងប្អូនដែល រស់នៅក្នុង ស្រុកភ្នំស្រួច (ឃុំចំបក់ ឃុំតាំងសំរោង ឃុំតាំងស្យា និងឃុំមហាសាំង ) និងមួយផ្នែកនៃស្រុក សំរោងទង (ឃុំតាំងក្រូច) ទាំងអស់មេត្តាជ្រាបថា នៅវេលាម៉ោង១៦ រសៀលនេះទំនប់ចំការតែ ដែលមានសមត្ថភាពស្តុកទឹកពី៥ទៅ៧ លានម៉ែត្រត្រីគុណ បានបាក់ហើយ។»

លោកអភិបាលបញ្ជាក់ថា ដូច្នេះសូមពុកម៉ែមាមីង បងប្អូនដែលរស់នៅតាមបណ្ដាឃុំពាក់ព័ន្ធ ជាពិសេសបងប្អូនប្រជាពលរដ្ឋ ដែលរស់នៅប្របនឹងមាត់ស្ទឹង សូមមេត្តាប្រុងប្រយ័ត្នឲ្យបានខ្ពស់ ។ ក្នុងន័យនេះដែរ សូមអំពាវនាវ ដល់អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធទាំងបីប្រភេទ សូមមេត្តាយកចិត្តទុកដាក់ នៅក្នុងការរក្សាកម្លាំង ដើម្បីទុកចុះជួយបងប្អូន ប្រជាពលរដ្ឋនៅពេលដែលគាត់ត្រូវការសង្គ្រោះ ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top