ភ្នំពេញ ៖ ប្រជាពលរដ្ឋ និងកម្មកររោងចក្រចំនួន៦៩៧នាក់ ត្រូវបានកងកម្លាំងសង្គ្រោះរបស់កងពលតូចលេខ៧០ ចុះជួយដឹកជញ្ជូនសម្ភារៈរបស់ខ្លួនពីក្នុងរោងចក្រទៅផ្ទះរបស់ពួកគាត់ នៅថ្ងៃទី១៩ ខែតុលា ឆ្នាំ២០២០ ក្នុងសង្កាត់ស្ពានថ្ម ខណ្ឌដង្កោ ដែលកំពុងទទួលរងការលិចលង់ដោយទឹកជំនន់។
តាមរបាយការណ៍របស់លោកឧត្តមសេនីយ៍ទោ សូយ ណារិទ្ធ មេបញ្ជាការរងកងពលទទួលគ្រប់គ្រងកង សង្រ្គោះមានប្រសាសន៍ថា ចាប់ពីថ្ងៃទី១៤រហូតមកដល់ថ្ងៃ១៩ តុលា នៅផ្សារព្រែកជ្រៃបានសង្រ្គោះ និងដឹកជញ្ជូនចំនួន ១០៣ដង ស្មើនឹងប្រជាពលរដ្ឋចំនួន ៦៩៧នាក់។
សរុបរួមបានសង្រ្គោះ និងដឹកជញ្ជូនចំនួន ១,០៦៩ដង ស្មើនឹងប្រជាពលរដ្ឋចំនួន ៥,៤៤១នាក់។ ការដឹកជញ្ជូននេះដែរ បានធ្វេីឡេីងតាមរយៈរបាយការណ៍ដែលទទួលបានពីលោកមេបញ្ជាការងកងពល ។ មធ្យោបាយសម្រាប់ដឹកជញ្ជូន និងសង្រ្គោះប្រជាពលរដ្ឋគឺប្រេីប្រាស់អូប័រចំនួន ១០គ្រឿង និងកម្លាំងប្រមាណ១០០នាក់។
លេីសពីនេះទៅទៀត សម្រាប់កងកម្លាំងរបស់កងពលតូច លេខ៧០ មិនត្រឹមតែជួយក្នុងពេលមានទឹកទឹកជំនន់នេះទេ គឺកន្លងមកកម្លាំងបានចុះបេសកកម្មការពារថ្នាក់នាំជួយ សង្រ្គោះពន្លត់អគ្គិភ័យ គ្រោះថ្នាក់ចរាចរណ៍ និងបានចូលរួមការងារមនុស្សធម៍ជាច្រេីនទៀតផងដែរ។
ក្នុងនោះ លោកឧត្តមសេនីយ៍ឯក ម៉ៅ សុផាន់ មេបញ្ជាការកងពលតូចលេខ៧០ តែងតែយកចិត្តទុកដាក់និងចុះសួរសុខទុក្ខប្រជាពលរដ្ឋជានិច្ច ហេីយក៏បានដាក់បទបញ្ជាភ្លាមៗ នៅពេលប្រជាពលរដ្ឋមានបញ្ហា ដេីម្បីអន្តរាគមន៍ការលំបាកជូនពួកគាត់គ្រប់ពេលវេលា៕
