ព័ត៌មានជាតិ

ស្លាប់៥នាក់ ក្នុងចំណោមអ្នករងគ្រោះ ១១៥នាក់ ករណីសង្ស័យពុលស្រា​ស​ នៅខេត្តកំពង់ឆ្នាំង

ភ្នំពេញ៖ លោកស្រី ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល បានអោយដឹងថា គិតត្រឹមម៉ោង១៨:០០នាទីនៃថ្ងៃទី២៩​ ខែវិច្ឆិកា​ ឆ្នាំ២០២០​ មានមនុស្ស​ស្លាប់៥នាក់ក្នុងចំណោមអ្នករងគ្រោះ១១៥នាក់ ករណីសង្ស័យពុលស្រា​ស​នៅខេត្តកំពង់ឆ្នាំង ។


លោកស្រី​ឲ្យដឹង​បន្ថែម​ថា​បេីយោងតាមរបាយការណ៍​របស់មន្ទីរសុខាភិបាលខេត្តកំពង់ឆ្នាំង​ ករណីសង្ស័យពុលស្រាស នៅខេត្តកំពង់ឆ្នាំង​ នាថ្ងៃទី២៨​ ខែវិច្ឆិកា​ ឆ្នាំ២០២០​ បានកេីតឡេីងនៅឃុំខ្លុងពពក​ ស្រុកទឹកផុស​ ខេត្តកំពង់ឆ្នាំង​ ដែលមានដូចតទៅ៖
១.​ បានទទួលព្យាបាល​អ្នកមានអាការ:សង្ស័យពុលស្រាស​ នៅមន្ទីរពេទ្យខេត្ត​កំពង់ឆ្នាំង​ មានចំនួន​ ១០៥នាក់​ (ស្រី​ ៦នាក់)​ ក្នុងចំណោមនោះ​ អ្នកមានស្ថានភាពធ្ងន់ធ្ងរចំនួន​ ៦នាក់​ និងបានបញ្ជូន​ទៅមន្ទីរពេទ្យកាល់ម៉ែតចំនួន ០៥នាក់​ (ស្លាប់នៅតាមផ្លូវ​ពេលបញ្ជូនចំនួន​ ០២នាក់​ និងករណីនៅធ្ងន់ធ្ងរកំពុងសង្គ្រោះ​ ០១នាក់)​ មានករណីស្លាប់នៅមន្ទីរពេទ្យខេត្ត​កំពង់ឆ្នាំង​ ០១នាក់​ ស្លាប់នៅផ្ទះ​ ០១នាក់​ និងបានព្យាបាលនៅមណ្ឌលសុខភាពអភិវឌ្ឍន៍​ ចំនួន​ ១០​ នាក់។ ជាសរុប​ អ្នករងគ្រោះ​ចំនួន​ ១១៥​នាក់​ (ស្រី៦នាក់)​ ក្នុងនោះស្លាប់​ ៥នាក់។

លោកស្រីបានអោយដឹងទៀតថា បច្ចុប្បន្នអ្នកជំងឺដែលកំពុងសម្រាកព្យាបាល​ មានការវិវត្តន៌មកស្ថានភាពល្អ​ប្រសេីរវិញហេីយ ។ មូលហេតុអ្នក​ទាំងអស់ខាងលេី បានមកចូលរួមកំដរបុណ្យសពក្នុងភូមិ​ ហើយជួបជុំគ្នាពិសារស្រាស​ រីឯការសន្និដ្ឋានរបស់ក្រុមការងារចុះស្រាវជ្រាវពិនិត្យ​ គឺជាករណីសង្ស័យពុលស្រាស។

ជាមួយគ្នានេះក្រសួងសុខាភិបាល ក៏បានដាក់ចេញវិធានការណ៏​ និងអន្តរាគមន៌ជួយដល់អ្នកសង្ស័យពុលស្រាស​ មានដូចតទៅ​ ៖
-​ ពេលទទួលបានព័ត៌មាននៅល្ងាចថ្ងៃទី២៨​ ខែវិច្ឆិកា​ ឆ្នាំ២០២០​ ឯកឧត្តមសាស្ត្រាចារ្យ​ ម៉ម​ ប៊ុនហេង​ រដ្ឋមន្ត្រីក្រសួងសុខាភិបាល​ បានចាត់ថ្នាក់ដឹកនាំជាន់ខ្ពស់ចំនួន​ ០៣រូប​ និងមានក្រុមឆ្លេីយតបបន្ទាន់នៃនាយកដ្ឋានប្រយុទ្ធនឹងជំងឺឆ្លងនៃកហរសួងសុខាភិបាល​ ចុះធ្វេីដំណេីរទាំងយប់ទៅខេត្តកំពង់ឆ្នាំង​ ដេីម្បីជួយការងារបច្ចេកទេសដល់មន្ទីរសុខាភិបាលខេត្តកំពង់ឆ្នាំង​ រហូតដល់ស្ថានភាពគ្រប់គ្រងបានទាំងស្រុង។
-ចាត់វិធានការណ៏ហាមការផឹកស្រាស​ និងបញ្ឈប់ការធ្វេីចរាចរលក់ដូរស្រាស​ ជា​បន្ទាន់​។
-​ បានសង្រ្គោះជនរងគ្រោះ​ បញ្ជូនមកព្យាបាលនៅមន្ទីរពេទ្យខេត្កំពង់ឆ្នាំងបានទាន់ពេល​ លេីកលែងអ្នកដែលមានសភាពធ្ងន់ធ្ងរពេកដែលបានបាត់បង់ជីវិតគួរឲ្យសោកស្តាយជាទីបំផុត។
-​ បន្តអប់រំសុខភាពប្រជាពលរដ្ឋជាបន្តទៀត​ ជាពិសេសមិនត្រូវពិសារស្រាសដែលផលិតគ្មានបច្ចេកទេសត្រឹមត្រូវ៕

To Top