ព័ត៌មានជាតិ

សម្ដេចតេជោ ហ៊ុន សែន ផ្ដាំផ្ញើដល់ កម្មករ-កម្មការិនី កុំរត់ចេញពីថៃ ខណៈថៃ កំពុងមានការលំបាក

ភ្នំពេញ ៖ ក្រោយពីខេត្តសាមុតសាខន ប្រទេសថៃ កំពុងផ្ទុះជំងឺកូវីដ១៩សារជាថ្មី នោះ សម្ដេចតេជោ ហ៊ុន សែន នាយ ករដ្ឋមន្ដ្រីនៃកម្ពុជា បានផ្ដាំផ្ញើទៅដល់ កម្មករ-កម្មការិនីខ្មែរ ដែលកំពុងធ្វើការងារនៅប្រទេសថៃ កុំមានការរត់ចេញពីថៃ ឡើយ ដោយបន្ដធ្វើការងារ និងរស់នៅជាធម្មតា ជាពិសេស កុំមានការភ័យខ្លាចក្នុងស្ថានភាពបែបនេះ។ 

តាមរយៈសារសំឡេងរបស់ សម្ដេចតេជោ ហ៊ុន សែន នៅយប់ថ្ងៃទី២០ ខែធ្នូ ឆ្នាំ២០២០ បានថ្លែងថា គិតរហូតមកដល់ ពេលនេះ ខេត្តសាមុតសាខន មានអ្នកឆ្លងជំងឺកូវីដ-១៩ ចំនួន៥៧៦នាក់។សម្ដេចថា ការឆ្លងបែបនេះមិនមានសភាព ធ្ងន់ធ្ងរឡើយ បើប្រៀបធៀបជាមួយប្រជាជន មានជាង៦០លាននាក់។ 

សម្ដេចតេជោ បន្ដថា ប៉ុន្ដែការឆ្លងបែបនេះមានការភ័យខ្លាចពីកម្មករខ្មែរ ដែលធ្វើការនៅប្រទេសថៃ។សម្ដេចអំពាវនាវ ឲ្យពលករខ្មែរធ្វើការនៅប្រទេសថៃ ត្រូវមានការទុកចិត្តពី រាជរដ្ឋាភិបាលថៃ ដែលកំពុងគ្រប់គ្រងស្ថានភាពបែបនេះ។ 

សម្ដេចតេជោ មានប្រសាសន៍ថា «សង្ឃឹមថា បងប្អូនកម្មករ កម្មការិនីរបស់យើងដែលធ្វើការនៅក្នុងប្រទេសថៃជឿទុក ចិត្តទៅលើសមត្ថភាពនៃការដោះស្រាយរបស់រាជរដ្ឋាភិបាលថៃ សមត្ថកិច្ចពាក់ព័ន្ធរបស់ថៃ ដែលធ្វើការនៅទីនោះ មិនគួររត់ចាកចេញពីប្រទេសថៃ ក្នុងពេលដែលថៃមានការលំបាក។ ដូចដែលខ្ញុំព្រះករុណាខ្ញុំធ្លាប់បាននិយាយហើយថា ស្រឡាញ់គ្នាក្នុងគ្រាក្រ ស្គាល់មិត្តល្អក្នុងគ្រាលំបាក»។ 

សម្តេចតេជោ បន្តថា «ដូច្នេះយើងគួរតែឋិតនៅទីនោះ ម្ខាងគឺដើម្បីរក្សានូវការពារខ្លួននៅនឹងកន្លែង ដោយមានការការ ពារជាចាំបាច់ពី សំណាក់រាជរដ្ឋាភិបាលថៃ ផ្តល់នូវលទ្ធភាពក្នុងការការពារខ្លួន និងមួយផ្នែកទៀតជៀសវាងនូវការវិល ត្រឡប់ដែលនឹងនាំមកដល់នូវការនាំចូលប្រសិនបើមាន អាចនាំចូលមកកាន់កម្ពុជារបស់យើង។ នេះជាការអំពាវនាវ ទៅដល់បងប្អូនពលករដែលកំពុងរស់នៅក្នុងប្រទេសថៃ»។ 

សម្ដេចតេជោ បានអំពាវនាវបន្ថែមទៀតថា ឪពុក-ម្ដាយ ដែលមានកូនធ្វើការងារនៅប្រទេសថៃ ត្រូវលើកទឹកចិត្តឲ្យពួ កគាត់ខិតខំធ្វើការងារបន្ថែមទៀត កុំឲ្យត្រឡប់មកផ្ទះក្នុងស្ថានភាពបែបនេះ ជាពិសេស ត្រូវធ្វើយ៉ាងរក្សាឲ្យបានការងារ ធ្វើនៅទីនោះ។សម្ដេច សង្ឃឹមថា កម្មករ-កម្មការិនី នឹងបន្ដធ្វើការជាមួយប្រជាជនថៃ។ដូច្នេះ កុំចូលប្រទេសកម្ពុជា មួយ រយៈពេលសិន ដើម្បីទប់ស្កាត់ការរីករាលដាលជំងឺកូវីដ-១៩ ក្នុងសហគមន៍។ 

សម្ដេចតេជោ បន្ថែមថា ប្រជាពលរដ្ឋចង់ទៅប្រទេសថៃ ទាំងស្របច្បាប់ និងមិនស្របច្បាប់ ត្រូវពន្យល់ពេលមួយរយៈ សិន។សម្ដេចថា សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ក៏បានចេញបទបញ្ជាខេត្តជា ប់ព្រំដែនជាមួយថៃ ត្រូវធ្វើការងារជាមួយភាគីថៃ ដើម្បីឲ្យភាគីថៃទទួលខុសត្រូវដែលពលករខ្មែរចូលទៅក្នុងទឹកដីថៃ ដែលត្រូវធ្វើចត្តាឡីស័ក ដោយមានការចំណាយខាងភាគីថៃ។ 

ឆ្លៀតឱកាសនោះ សម្ដេចតេជោ ហ៊ុន សែន ក៏បានសម្រេចបញ្ចេញរថយន្តកងទ័ពរ ចំនួន៧០គ្រឿង ទៅតាមព្រំដែន ចំនួន៣ ដែលនៅជាប់ជាមួយប្រទេសថៃ ការពារក្នុងករណីពលរដ្ឋខ្មែរភ័យខ្លាចការឆ្លងកូវីដ-១៩នៅប្រទេសថៃហើយ សម្រកចូលមកកម្ពុជា។ 

សម្ដេចតេជោ បញ្ជាក់ថា ច្រកព្រំដែនទាំង៣នោះមាន៖ ច្រកអូស្មាច ច្រកប៉ោយប៉ែត ច្រកដូង។ច្រកទាំង៣នេះ ជាច្រកដែលក្រសួងសុខាភិបាលត្រៀមខ្លួនក្នុងករណីពលរដ្ឋខ្មែរដែលជាពលរដ្ឋសម្រុកចូលមកកម្ពុជាវិញ ដោយសារភាពភ័យខ្លាចនិងការឆ្លងក្នុងសហគមន៍របស់ប្រទេសថៃ។ 

សម្ដេចតេជោ បញ្ជាក់យ៉ាងដូច្នេះថា «ទទួលព័ត៌មានពីអគ្គមេបញ្ជាការកងទ័ពរ ក៏ដូចជា មេបញ្ជាការកងទ័ពរជើងគោក រថយន្ដនឹងចេញទៅយប់នេះទៅកាន់៣ច្រក ដែលបានត្រៀមបំម្រុងទុក សម្រាប់ច្រកអូស្មាច ច្រកដូង និង ច្រកប៉ោយប៉ែត រថយន្ដប្រមាណ៧០គ្រឿង ដែលត្រូវទៅទីនោះ»។ 

ជាងនេះទៅទៀត សម្ដេចតេជោ ហ៊ុន សែន ក៏បានចេញបទបញ្ជា ដល់អាជ្ញាធរពាក់ព័ន្ធត្រូវគ្រប់គ្រងឲ្យ បាននៅពេលដែលពលរដ្ឋខ្មែរសម្រកចេញពីថៃ ដោយមិនត្រូវអនុញ្ញាតឲ្យពលរដ្ឋដើរឃ្លាតឆ្លាយពីការគ្រប់គ្រង របស់ក្រសួងសុខាភិបាលបានទេ ហើយត្រូវពង្រឹងការធ្វើចត្តាឡីស័កសម្រាប់ពលករខ្មែរដែលត្រឡប់មកប្រទេសថៃ រយៈពេល១៤ថ្ងៃពេញ ដើម្បីទប់ស្កាត់ការចម្លងជំងឺកូវីដ១៩៕

To Top