ព័ត៌មានជាតិ

អាមេរិក រារាំងមិនឱ្យមីយ៉ាន់ម៉ា ដកលុយចំនួន ១ពាន់លានដុល្លារ ពីធនាគារញូយ៉ក ក្រោយពីយោធាធ្វើរដ្ឋប្រហារ

បរទេស៖ កាលពីដើមខែនេះ ប្រធានាធិបតីអាមេរិក លោក Joe Biden បានចេញបទបញ្ជាប្រតិបត្តិមួយ ដែលរារាំងមីយ៉ាន់ម៉ាមិនឱ្យចូលទៅ កាន់មូលនិធិដែលកំពុងកាន់កាប់ ដោយធនាគារអាមេរិក។ បទបញ្ជានេះបានកើតឡើង បន្ទាប់ពីយោធានៃប្រទេសអាស៊ីអាគ្នេយ៍មួយនេះ បានធ្វើរដ្ឋប្រហារនិងទម្លាក់មន្ត្រីរដ្ឋាភិបាល ដែលបានជាប់ឆ្នោត តាមបែបប្រជាធិបតេយ្យ។

យោងតាមសារព័ត៌មាន Sputnik ចេញផ្សាយនៅថ្ងៃទី៦ ខែមីនា ឆ្នាំ២០២១ បានឱ្យដឹងថា ក្រុមមន្រ្តីរដ្ឋាភិបាលសហរដ្ឋអាមេរិក បានរារាំងការដឹកនាំយោធា របស់មីយ៉ាន់ម៉ាពីការដកប្រាក់ចំនួន ១ពាន់លានដុល្លារ ដែលបានកាន់កាប់នៅធនាគារកណ្តាល សហព័ន្ធញូវយ៉កកាលពីដើមខែកុម្ភៈ គ្រាន់តែប៉ុន្មានថ្ងៃ បន្ទាប់ពីយោធារបស់ប្រទេសនេះ បានដណ្តើមអំណាច។

ដោយដកស្រង់សំដីមន្រ្តីចំនួន ៣ រូប, ទីភ្នាក់ងារសារព័ត៌មានរ៉យទ័របានរាយការណ៍ថា ប្រតិបត្តិការនេះត្រូវបានប៉ុនប៉ងដោយ ធនាគារកណ្តាលមីយ៉ាន់ម៉ា កាលពីថ្ងៃទី៤ ខែកុម្ភៈគឺ ៣ ថ្ងៃបន្ទាប់ពីរដ្ឋប្រហារយោធាបានលាតត្រដាង និងទទួលបានការចាប់អារម្មណ៍ ពីមេដឹកនាំពិភពលោក។

ប្រភពមួយក្នុងចំណោមប្រភពទាំងនោះ បានជូនដំណឹងថា សំណើហិរញ្ញវត្ថុត្រូវបានរារាំងដោយស្វ័យប្រវត្តិ ពីព្រោះប្រទេសមីយ៉ាន់ម៉ា ធ្លាប់ត្រូវបានគេដាក់ឈ្មោះ ក្នុង «បញ្ជីពណ៌ប្រផេះ» របស់ក្រុមការងារសកម្មភាពហិរញ្ញវត្ថុអន្ដរជាតិ ដោយសារកង្វល់អំពីការលាងលុយកខ្វក់។ ប្រទេសមីយ៉ាន់ម៉ាបានរាយការណ៍ថា បានឈានចូលនៅក្នុងបញ្ជីដោយសារក្តីបារម្ភថា មូលនិធិជួញដូរគ្រឿងញៀនត្រូវបាន គេបោសសំអាតតាមរយៈប្រព័ន្ធធនាគាររបស់ប្រទេស ៕

ប្រែសម្រួលៈ ណៃ តុលា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×