ព័ត៌មានជាតិ

លោក សយ សុភាពថា ខ្លួនបានចាក់វ៉ាក់សាំង ស៊ីណូហ្វាម ៣សប្តាហ៍ មកហើយអត់ មានបញ្ហាអ្វីទេ

ភ្នំពេញ ៖ លោក សយ សុភាព ក្នុងនាមជាអ្នកចូលចិត្តវិភាគ ស្ថានការណ៍នយោបាយ ទាំងក្នុង និងក្រៅប្រទេសម្នាក់ដែរនោះ បានលើកពីករណីផ្ទាល់ខ្លួនថា លោកបានចាក់វ៉ាក់សាំង ការពារជំងឺកូវីដ១៩ ឈ្មោះស៊ីណូហ្វាម ដែលជាជំនួយឥតសំណង របស់ប្រទេសចិន មានរយៈពេល៣សប្តាហ៍ មកហើយ ប៉ុន្តែអត់មានបញ្ហា អ្វីកើតឡើងគួរឲ្យកត់សំគាល់ទេ ។

លោកបានលើកឡើង តាមរយៈបណ្តាញសង្គមហ្វេសប៊ុក នាថ្ងៃ២៩ មីនាថា “ខ្ញុំបានចាក់វ៉ាក់សាំងស៊ីណូហ្វាម គ្រប់ចំនួនអស់រយៈពេល ៣សប្តាហ៍មកហើយ ខ្ញុំអត់មានបញ្ហាដូច Cambodia Daily ផ្សាយទេ ។ សុខភាពធម្មតា” ។

ក្នុងន័យនេះ លោកបញ្ជាក់ថា កុំជឿតាមការញុះញង់របស់គេ ត្រូវតែមានជំនឿលើថ្នាក់ដឹកនាំកម្ពុជា ។ ដូចគ្នានេះលោកបានលើកពីអតីតកាល មកថា “៩ ១១ ៥៣ និង ២៩ ១២ ៩៨ ជារបស់វីរៈបុរសជាតិខ្មែរតែមួយគត់ គឺ សម្តេចព្រះបាទ នរោត្តម សីហនុ និងសម្តេចតេជោ ហ៊ុន សែន។ ក្រៅពីនោះជាមនោគមន៍វិជ្ជា របស់បរទេសធ្វើឲ្យខ្មែរឈ្លោះគ្នា” ។

ផេករបស់សារព័ត៌មាន The Cambodia Daily Khmer ដោយដកស្រងពីទូរទស្សន៍ជាតិកម្ពុជា (ទទក) កាលពីថ្ងៃទី២៨ ខែមីនា បានសរសេរលើទំព័រ Facebook របស់ខ្លួនដោយដកស្រង់សម្ដី នាយកប្រតិបត្តិឱសថជនជាតិចិន របស់ក្រុមហ៊ុន ស៊ីណូហ្វាម មកចុះផ្សាយថា ក្រុមហ៊ុននឹងចាំបាច់ ត្រូវវាយតម្លៃលទ្ធផល ពីការសាកល្បង ដំណាក់កាលទី៣ នៅក្រៅប្រទេស ជាមុនសិន ដើម្បីសម្រេចថា តើគួរតែត្រូវចាក់វ៉ាក់សាំង បង្ការរោគបន្ថែមលើវ៉ាក់សាំង បង្ការជំងឺកូវីដ១៩ ដែលត្រូវចាក់ពីរដូស របស់ខ្លួន ឬយ៉ាងណា?៕

To Top
×