ភ្នំពេញ៖ ដោយមានការអនុញ្ញាត ពីលោក អ៊ុក សមវិទ្យា ប្រតិភូរាជរដ្ឋាភិបាល ទទួលបន្ទុកជាអគ្គនាយក បេឡាជាតិសន្តិសុខសង្គម (ប.ស.ស.) នារសៀលថ្ងៃព្រហស្បតិ៍ ទី១៣ ខែឧសភា ឆ្នាំ២០២១ នេះលោក ហេង សុផាន់ណារិទ្ធ ប្រធាននាយកដ្ឋាន សេវាអតិថិជន និងទំនាក់ទំនងសាធារណៈ បានដឹកនាំកិច្ចប្រជុំមួយ ស្តីពីការរៀបចំបង្កើត ក្រុមជនបង្គោល ដើម្បីឆ្លើយតបរហ័ស ទៅនឹងចម្ងល់សមាជិករបស់ខ្លួន ក្នុងគ្រាដែលជំងឺកូវីដ-១៩ កំពុងតែបន្តរីករាលដាល ក្នុងពិភពលោក រួមទាំងកម្ពុជា យើងផងដែរ ។
ថ្លែងទៅកាន់អង្គប្រជុំ ឯកឧត្តម ហេង សុផាន់ណារិទ្ធ បានបញ្ជាក់ឱ្យដឹងថា ក្នុងគ្រាដែលជំងឺកូវីដ-១៩ នៅតែបន្តរីករាលដាល ប.ស.ស. បានសម្រេចផ្អាក ជាបណ្តោះអាសន្ន ក្នុងការចុះអប់រំផ្សព្វផ្សាយរបស់ខ្លួន ដោយផ្ទាល់ដល់សមាជិករបស់ខ្លួន ដូច្នេះការបង្កើតឱ្យមាន ក្រុមជនបង្គោលនេះឡើង គឺដើម្បីសម្របសម្រួលឆ្លើយតប និងដោះស្រាយ រាល់ចម្ងល់ផ្សេងៗរបស់បងប្អូន ដែលជាសមាជិក ប.ស.ស. ក៏ដូចជាសាធារណជន ទូទៅផងដែរ។
ក្នុងកិច្ចប្រជុំនេះ លោក ហេង សុផាន់ណារិទ្ធ បានជម្រុញ និងលើកទឹកចិត្តដល់ក្រុមជនបង្គោលទាំងអស់ ត្រូវចេះសហការគ្នា និងចូលរួមឆ្លើយតប ទៅកាន់សមាជិក ប.ស.ស. ក៏ដូចជាសាធារណជន ដែលមានចម្ងល់ផ្សេងៗ ពាក់ព័ន្ធទៅនឹងការប្រើប្រាស់ សេវា ប.ស.ស. ព្រមទាំងដោះស្រាយបញ្ហាផ្សេងៗ ឱ្យបានទាន់ពេលវេលា ប្រកបដោយទំនួលខុសត្រូវខ្ពស់។
សូមបញ្ជាក់ថា កិច្ចប្រជុំនេះប្រព្រឹត្តទៅ នៅសាលប្រជុំធំ ប.ស.ស. ស្នាក់ការកណ្តាលរាជធានីភ្នំពេញ ដោយមានវត្តមាន ចូលរួមពីក្រុមជនបង្គោល ជាថ្នាក់ដឹកនាំ និងមន្រ្តីជំនាញ នៃគ្រប់នាយកដ្ឋានទាំងអស់ នៃ ប.ស.ស. សរុបជាង ២០នាក់៕
