ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានសម្ដែងការសោកស្ដាយ ចំពោះការកើតឡើង នៃការឆ្លងរីករាលដាល ជំងឺកូវីដ-១៩ ក្នុងព្រឹត្តិការណ៍សហគមន៍ ២០ កុម្ភៈ ហើយ សម្ដេច ចាក់ទុកថា ជាមហរាន្ដរាយ ដ៏ធ្ងន់ធ្ងរសម្រាប់កម្ពុជា។
ក្នុងសន្និសីទអន្តរជាតិ លើកទី២៦ ស្តីពីអនាគតរបស់អាស៊ី ក្រោមប្រធានបទ «ការរៀបចំសម័យកាលថ្មី ក្រោយវិបត្តិកូវីដ តួនាទីរបស់អាស៊ី ក្នុងការស្តារពិភពលោកឡើងវិញ» នាថ្ងៃទី២០ ខែឧសភា ឆ្នាំ២០២១ សម្ដេចតេជោ ហ៊ុន សែន បានឱ្យ ដឹងថា កម្ពុជាបន្ដស្វែងរកវ៉ាក់សាំង ជំងឺកូវីដ១៩ ចាក់ជូនប្រជាពលរដ្ឋ ដែលរហូតមកដល់ពេលនេះ ចាក់ប្រជាពលរដ្ឋ ជាង២លាននាក់ ស្មើនឹង២១% នៃចំនួនប្រជាជន ១០លាន ដែលត្រូវចាក់វ៉ាក់សាំង។
សម្ដេចតេជោ បន្ដថា យុទ្ធសាស្ដ្រចាក់វ៉ាក់សាំង នៅកម្ពុជា គឺប្រកាន់យកយុទ្ធសាស្ដ្រ «ផ្ការីក» តាមរយៈចាក់ស្រោចទីក្រុង ភ្នំពេញរួច ទើបចាក់តាមបណ្ដាខេត្តនានា របស់កម្ពុជា។
សម្ដេចតេជោ សង្ឃឹមថា វិធានការចាក់វ៉ាក់សាំងនេះ នឹងកាត់បន្ថ យអ្នកឆ្លង និងអ្នកស្លាប់ ដោយសារជំងឺកូវីដ-១៩។
សម្ដេចតេជោ ហ៊ុន សែន មានប្រសាសន៍ថា «យើងខ្ញុំ មានការសោកស្ដាយ ជាមួយនឹងការកើតឡើង នូវមហរាន្ដរាយ យើងខ្ញុំចាក់ទុកថា គឺជាមហរាន្ដរាយដ៏ធ្ងន់ធ្ងរ សម្រាប់ព្រះរាជាណាចក្រកម្ពុជា ក្នុងដំណាក់កាលថ្មីរបស់យើង»។
សម្ដេចតេជោ បន្ថែមថា ទោះបីសេដ្ឋកិច្ចសកល ឆ្នាំ២០២១នេះ ត្រូវបានរំពឹងថា នឹងងើបឡើងវិញក៏ដោយ សកលលោកនៅតែប្រឈម នឹងភាពមិនប្រាកដប្រជាខ្ពស់ ដោយសារហានិភ័យ ពីរលកថ្មីនៃជំងឺកូវីដ-១៩ និងការបំប្លែងខ្លួនថ្មី នៃ វីរុសកូរ៉ូណា ដែលមានសភាព កាន់តែកាចសាហាវ និងស្រួចស្រាល់ ដែលអាចនឹង បន្តរំខានដល់ជវភាព សេដ្ឋកិច្ចសកល។
សូមរំលឹកថា គិតត្រឹមថ្ងៃទី២០ ខែឧសភា ឆ្នាំ២០២១ កម្ពុជារកឃើញ អ្នកឆ្លងជំងឺកូវីដ-១៩ ចំនួន២៣,៦៩៧នាក់ ក្នុងនោះ អ្នកជាសះស្បើយ ចំនួន ១៥,៧០០នាក់ និងស្លាប់ ចំនួន១៦៤នាក់៕
