ភ្នំពេញ ៖ ក្រសួងបរិស្ថាន បានអំពាវនាវដល់ប្រជាពលរដ្ឋចូលរួមវេចខ្ចប់ និងញែកសំរាមតាមប្រភេទ ជៀសវាងបោះសំរាម ចោលផ្តេសផ្តាសដែលឈានទៅធ្វើឲ្យប៉ះពាល់សោភណ្ឌភាព និងផាសុកភាពសង្គម ។
![](https://dap-news.com/wp-content/uploads/2021/08/photo_2021-08-02_10-36-53-1024x768.jpg)
តាមរយៈគេហទំព័រហ្វេសប៊ុក នាថ្ងៃទី២ ខែសីហា ឆ្នាំ២០២១ ក្រសួងបរិស្ថាន បានឲ្យដឹងថា ដើម្បីពង្រឹងសមត្ថភាពមន្ត្រី មូលដ្ឋាន ក្នុងការគ្រប់គ្រងសំណល់រឹងសំរាមប្រកបដោយប្រសិទ្ធភាពបន្ថែមទៀត ក្រសួង បន្តគាំទ្ររដ្ឋបាលមូលដ្ឋាន តាមរយៈការបំពាក់សម្ភារៈ និងបណ្តុះបណ្តាលជំនាញបន្ថែម ដើម្បីឈានឆ្ពោះទៅរកការគ្រប់គ្រងសំរាមសំណល់រឹង ទីប្រជុំជន ប្រកបដោយប្រសិទ្ធភាព និងប្រសិទ្ធផល។
ក្រសួងបញ្ជាក់ថា «សូមអំពាវនាវដល់ប្រជាពលរដ្ឋចូលរួមវេចខ្ចប់សំរាមឲ្យបានត្រឹមត្រូវ និងញែកសំរាមតាមប្រភេទ ជៀសវាងការបោះសំរាមចោលផ្តេសផ្តាស ដែលធ្វើឲ្យប៉ះពាល់ដល់សោភណ្ឌភាព និងផាសុកភាពសង្គម»។
![](https://dap-news.com/wp-content/uploads/2021/08/photo_2021-08-02_10-36-46-1024x768.jpg)
ជាងនេះទៅទៀត ក្រសួងបរិស្ថាន ក៏បានបំពាក់ឡដុតសំរាមសំណល់រឹង ចំនួន៥០គ្រឿង ទៅដល់២១រាជធានី-ខេត្ត ស្មើនឹង ៤៩ស្រុក បានការបំពាក់ឡដុតសំរាមសំណល់រឹងនេះ ជាវិធានការបន្ទាន់ចំពោះមុខ រីឯការគ្រប់គ្រងសំរាមសំណ ល់រឹងតាមលក្ខណបច្ចេកទេស ដែលមានធុងដាក់សំរាមត្រឹមត្រូវមធ្យោបាយដឹកសំរាមគ្រប់គ្រាន់ និងទីលានចាក់សំរាមតាមខ្នាតបច្ចេកទេស ទើបជាវិធានការជាយុទ្ធសាស្ត្រនៃគោលនយោបាយ ស្តីពីការគ្រប់គ្រងសំរាមសំណល់រឹងទីប្រជុំជន។
![](https://dap-news.com/wp-content/uploads/2021/08/photo_2021-08-02_10-36-42-1024x569.jpg)
ក្រោយមានកិច្ចអន្តរាគមន៍ពី ក្រសួងបរិស្ថាន កន្លងមក ក្រសួងសង្កេតឃើញថា រដ្ឋបាលថ្នាក់ក្រោមជាតិ មួយចំនួន កំពុងអនុវត្តគោលនយោបាយ ស្តីពីការគ្រប់គ្រងសំរាមសំណល់រឹងទីប្រជុំជន បានយ៉ាងល្អប្រសើរ រួមមាន៖ ស្រុកបន្ទាយស្រី ខេត្តសៀមរាប ,ក្រុងព្រៃវែង និងស្រុកស្វាយអន្ទរ ខេត្តព្រៃវែង ,ស្រុកអូររាំងឪ ខេត្តត្បូងឃ្មុំ។
![](https://dap-news.com/wp-content/uploads/2021/08/photo_2021-08-02_10-36-49-1024x768.jpg)
ទន្ទឹមនឹងនេះដែរមាន ក្រុងព្រះសីហនុ និងស្រុកព្រៃនប់ ខេត្តព្រះសីហនុ ,ស្រុកអន្លង់វែង ខេត្តឧត្តរមានជ័យ ,ស្រុកស្នួល ខេត្តក្រចេះ ,ស្រុកពេជ្រាដា ខេត្តមណ្ឌលគីរី កំពុងឈានឆ្ពោះទៅរកការ គ្រប់គ្រងសំរាមសំណល់រឹង ប្រកបដោយប្រសិទ្ធភាព ក្នុងពេលអនាគតខាងមុខ៕
![](https://dap-news.com/wp-content/uploads/2020/08/1-1.png)