ព័ត៌មានជាតិ

អង្គការចលនា ដើម្បីសុខភាពកម្ពុជា គាំទ្រក្រសួងសុខាភិបាល ក្រើនរំលឹកក្រុមហ៊ុនថ្នាំជក់ បញ្ឈប់សកម្មភាពឆ្លៀតឱកាស ផ្សាយផលិតផលថ្នាំជក់

ភ្នំពេញ៖ អង្គការចលនាដើម្បីសុខភាពកម្ពុជា គាំទ្រចំណាត់ការរបស់ក្រសួងសុខាភិបាល ក្នុងការក្រើនរំលឹកដល់ ក្រុមហ៊ុនថ្នាំជក់ឲ្យបញ្ឈប់ជាបន្ទាន់ នូវសកម្មភាពឆ្លៀតឱកាស ផ្សព្វផ្សាយផលិតផលថ្នាំជក់ ឬការឧបត្ថម្ភជាសម្ភារផ្សេងៗ ដល់ក្រសួង-ស្ថាប័ន ឬរដ្ឋបាលថ្នាក់ក្រោមជាតិ ដែលជាទង្វើល្មើសច្បាប់ ស្តីពីការត្រួតពិនិត្យផលិតផលថ្នាំជក់។

អង្គការចលនាដើម្បីសុខភាពកម្ពុជា គាំទ្របែបនេះក្រោយ វិទ្យុជាតិកម្ពុជា នាចេញផ្សាយនាពេលថ្មីៗនេះថា លោកស្រី ឈា ឆដាភា ប្រធានមជ្ឈមណ្ឌលជាតិ លើកកម្ពស់សុខភាព និងជាសមាជិកគណៈកម្មាធិការ ត្រួតពិនិត្យផលិតផលថ្នាំជក់ បានស្នើសុំការសហការពី ក្រសួង-ស្ថាប័ន ដែលជាសមាជិកនៃគណៈកម្មាធិការ ត្រួតពិនិត្យផលិតផលថ្នាំជក់ ស្ថាប័នពាក់ព័ន្ធ ទាំងថ្នាក់ជាតិ និងថ្នាក់ក្រោមជាតិទាំងអស់ មិនត្រូវទទួលជំនួយឧបត្ថម្ភ ពីក្រុមហ៊ុនថ្នាំជក់ ដែលមានបង្ហាញពីឈ្មោះផលិតផល ឬឈ្មោះក្រុមហ៊ុនផលិតផលថ្នាំជក់នោះទេ ដោយហេតុថា ការឧបត្ថម្ភនេះ មិនមែនជាកិច្ចការសប្បុរសធម៌ ដែលចូលរួមចំណែក ជួយសង្គមនោះឡើយ។

លោកស្រីបានបន្ដថា ផ្ទុយទៅវិញ ទង្វើទាំងនេះគឺជាការផ្សព្វផ្សាយ ក្នុងគោលបំណងទាក់ទាញ ការចាប់អារម្មណ៍ និងឆ្លៀតឱកាសផ្សព្វផ្សាយ លើកតម្កើងកេរិ៍តឈ្មោះ និងដើម្បីផលប្រយោជន៍ ក្រុមហ៊ុនថ្នាំជក់តែប៉ុណ្ណោះ ហើយនេះជាទង្វើល្មើសច្បាប់។

គួរបញ្ជាក់ថា មាត្រា៣ នៃអនុក្រឹត្យ ស្តីពីការបង្កើតនិងការប្រព្រឹត្តទៅរបស់ គណៈកម្មាធិការ ត្រួតពិនិត្យផលិតផលថ្នាំជក់ បានចែងហាមសមាជិករបស់ខ្លួន មិនឱ្យមានទំនាស់ផលប្រយោជន៍ ឬទំនាក់ទំនងជាមួយឧស្សាហកម្មថ្នាំជក់។ ក្រសួង ស្ថាប័នមួយចំនួន និងរដ្ឋបាលរាជធានី ខេត្តទាំង២៥ ជាសមាជិកនៃគណៈកម្មាធិការនេះ។

យោងតាមសេចក្ដីប្រកាសព័ត៌មានរបស់ អង្គការចលនាដើម្បីសុខភាពកម្ពុជា នាថ្ងៃទី១០ ខែកញ្ញា ឆ្នាំ២០២១ថា «យើងសង្កេតឃើញថា កន្លងមកមានក្រុមហ៊ុនថ្នាំជក់មួយចំនួន បានឧបត្ថម្ភសម្ភារបង្ការកូវីដដល់ក្រសួង ស្ថាប័ន និងរដ្ឋបាលក្រោមជាតិ ដោយបានផ្សព្វផ្សាយ នូវសកម្មភាពទាំងនេះ ក្នុងបណ្តាញព័ត៌មានសង្គម ដើម្បីបិទបាំងនូវការពិត ដែលថា ការជក់បារីនេះហើយ ដែលបង្កហានិភ័យខ្ពស់ដល់ការឆ្លងជំងឺកូវីដ ហើយអ្នកជក់បារីដែលឆ្លងជំងឺកូវីដ ប្រឈមហានិភ័យសុខភាពខ្ពស់បំផុត បើធៀបទៅនឹងអ្នកមិនជក់បារី»។

អង្គការដដែល បានបញ្ជាក់ថា ក្រុមហ៊ុនបារីខ្លះទៀត បានឆ្លៀតឱកាសចែកចាយបារី ដល់រដ្ឋបាលថ្នាក់ក្រោមជាតិ ផ្សាយពាណិជ្ជកម្មទាក់ទាញ អ្នកជក់ថ្មីតាមរយៈផ្ទាំងរូបភាព តាមបណ្តាញព័ត៌មានសង្គម និងតាមភ្នាក់ងារផ្សាយ ពាណិជ្ជកម្មលក់បារីរបស់ខ្លួន។ សកម្មភាពទាំងអស់នេះ ផ្ទុយទៅនឹងគោលការណ៍ណែនាំ របស់រាជរដ្ឋាភិបាលកម្ពុជា ក្នុងការកាត់បន្ថយការ រីករាលដាលនៃជំងឺកូវីដ។

ជាមួយគ្នានេះ អង្គការចលនាដើម្បីសុខភាពកម្ពុជា លើកឡើងថា បើក្រុមហ៊ុនថ្នាំជក់មានបំណង រួមចំណែកកាត់បន្ថយជំងីកូវីដមែន ក្រុមហ៊ុនគួរតែបញ្ឈប់ការផ្សាយលក់បារី និងបង្ហាញសកម្មភាព ក្រុមហ៊ុនរបស់ខ្លួន ដើម្បីបិទបាំងការពិតទៀតទៅ។

សូមរំលឹកថា ដោយសារតែជំងឺបង្កឡើង ដោយសារការប្រើប្រាស់ថ្នាំជក់ ប្រជាពលរដ្ឋកម្ពុជាប្រមាណ ១៥ ០០០នាក់ បានស្លាប់ជារៀងរាល់ឆ្នាំ និងធ្វើឱ្យខាតបង់សេដ្ឋកិច្ចជាតិ ៦៤៩ លានដុល្លារសហរដ្ឋ។ នេះបើយោងតាមការសិក្សា របស់អង្គការសហប្រជាជាតិ សម្រាប់ប្រទេសកម្ពុជា ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top