ប្រមុខនុយក្លេអ៊ែរ អ៊ីរ៉ង់៖ ដល់ពេលដែលអាមេរិក កែប្រែគោលនយោបាយ ដែលមានកំហុស ហើយដកទណ្ឌកម្មចេញ

តេអេរ៉ង់៖ ប្រធានអង្គការថាមពលបរមាណូអ៊ីរ៉ង់ (AEOI) បានឲ្យដឹងថា ដល់ពេលដែលអាមេរិក ត្រូវកែប្រែគោលនយោបាយ ដែលមានគុណវិបត្តិរបស់ខ្លួន ហើយលុបចោលទណ្ឌកម្មទាំងអស់លើអ៊ីរ៉ង់ តាមលក្ខណៈជាក់ស្តែង និងអាចផ្ទៀងផ្ទាត់បាន នេះបើយោងតាមទីភ្នាក់ងារព័ត៌មានផ្លូវការអ៊ីរ៉ង់ IRNA ។

នៅក្នុងសុន្ទរកថាមួយទៅកាន់សម័យប្រជុំលើកទី ៦៥ នៃសន្និសីទទូទៅនៃទីភ្នាក់ងារថាមពលអាតូមិកអន្តរជាតិ (IAEA) ដែលបានចាប់ផ្តើមនៅរដ្ឋធានីវីយែន ប្រទេស អូទ្រីស កាលពីថ្ងៃច័ន្ទ ហើយនឹងបន្តរហូតដល់ថ្ងៃទី២៤ ខែកញ្ញា លោក ម៉ូហាម៉ាត់ អ៊ីស្លាមី បានកត់សម្គាល់ថា គោលនយោបាយ“ សម្ពាធអតិបរិមា” របស់អាមេរិកប្រឆាំងអ៊ីរ៉ង់ ដែលបានណែនាំ និងដេញតាមដោយអតីតប្រធានាធិបតីអាមេរិកលោក ដូណាល់ ត្រាំ បានបញ្ចប់ដោយបរាជ័យ។

លោកបានបន្ថែមថា ផែនការសកម្មភាពរួម (JCPOA) ដែលត្រូវបានចុះហត្ថលេខារវាងអ៊ីរ៉ង់និងក្រុមប្រទេស P5+1 ក្នុងឆ្នាំ២០១៥ គឺជាឧទាហរណ៍ច្បាស់លាស់មួយនៃសុឆន្ទៈរបស់ទីក្រុងតេអេរ៉ង់ ដោយសោកស្តាយអាមេរិក ដែលមិនត្រឹមតែមិនព្រមគោរពតាមកិច្ចព្រមព្រៀងនោះទេ ថែមទាំងដកខ្លួនចេញពីសន្ធិសញ្ញាថែមទៀត។

លោកក៏បានលើកឡើងផងដែរថា អ៊ីរ៉ង់តែងតែសហការជាមួយ IAEA ដោយអំពាវនាវឱ្យទីភ្នាក់ងារនេះបញ្ឈប់ការធ្វើនយោបាយលើកម្មវិធីនុយក្លេអ៊ែរដោយសន្តិវិធីរបស់សាធារណរដ្ឋអ៊ីស្លាម និងរក្សាឯករាជ្យភាពមិនលំអៀង និងវិជ្ជាជីវៈ។

កាលពីថ្ងៃអាទិត្យសប្តាហ៍មុនអគ្គនាយក IAEA លោក Rafael Grossi បានទៅទស្សនាទីក្រុងតេអេរ៉ង់ និងជួបពិភាក្សាជាមួយប្រធាន AEOI ។ លោក Eslami បានពិពណ៌នាការចរចា ដែលផ្តោតលើបញ្ហាបច្ចេកទេសថា មានលក្ខណៈស្ថាបនាហើយបានលើកឡើងថា“ ការកសាងទំនុកចិត្ត” គឺជាអ្វីដែលសំខាន់ សម្រាប់ទីក្រុងតេអេរ៉ង់ និងអង្គការឃ្លាំមើលនុយក្លេអ៊ែររបស់អង្គការសហប្រជាជាតិ។

បន្ទាប់ពីកិច្ចចរចាចំនួន ៦ លើកនៅទីក្រុងវីយែនចាប់តាំងពីខែមេសា ក្នុងគោលបំណងស្តារ JCPOA និងនាំអាមេរិកមកវិញនោះ ភាគីនានាបានឲ្យដឹងថា ភាពខុសគ្នាធ្ងន់ធ្ងរនៅតែមានរវាងក្រុងតេអេរ៉ង់ និងវ៉ាស៊ីនតោន សម្រាប់ការរស់ឡើងវិញនៃកិច្ចព្រមព្រៀងនេះ។ កិច្ចចរចាជុំទី ៦ បានបញ្ចប់នៅថ្ងៃទី ២០ ខែមិថុនា ដោយបច្ចុប្បន្នការចរចាកំពុងស្ថិតនៅបន្ដទៀត៕

ដោយ ឈូក បូរ៉ា