ភ្នំពេញ ៖ ក្នុងឆមាសទី១ ឆ្នាំ២០២១ គ្រោះថ្នាក់ចរាចរណ៍ បានកើតឡើង ចំនួន១.២៦១លើក ក្នុងនោះ បណ្តាលឲ្យស្លាប់ចំនួន ៧០៩នាក់ និងរបួសចំនួន១.៧៩២នាក់។
![](https://dap-news.com/wp-content/uploads/2021/09/860-1024x638.jpg)
ក្នុងកិច្ចប្រជុំបូកសរុបការងារ សុវត្ថិភាពចរាចរណ៍ផ្លូវគោកឆមាសទី១ របស់អគ្គលេខាធិការដ្ឋាន គណៈកម្មាធិការជាតិ សុវត្ថិភាពចរាចរណ៍ផ្លូវគោក (គ.ស.ច.គ) នាថ្ងៃទី២១ ខែកញ្ញា ឆ្នាំ២០២១ លោកស្រី មឹន មាណវី រដ្ឋលេខាធិការ ក្រសួងសាធារណការ និងជាអគ្គលេខាធិការ គ.ស.ច.គ. បានថ្លែងថា «ក្នុងឆមាសទី១ ឆ្នាំ២០២១ គ្រោះថ្នាក់ចរាចរណ៍កើតឡើង សរុប ១.២៦១លើក (យប់៥៤%) បណ្តាលឱ្យស្លាប់ ៧០៩នាក់ និងរបួស ១.៧៩២នាក់ (ធ្ងន់១.០៤៦នាក់)។ មូលហេតុបង្កគ្រោះថ្នាក់ រួមមាន ល្មើសល្បឿន៣៤% បើកបរមិនគោរពសិទ្ធិ២៣% មិនប្រកាន់ស្តាំ១៦% វ៉ាជែង៨% បត់៩% កត្តាយានយន្ត៣% ស្រវឹង៣% និងងងុយ១%»។
![](https://dap-news.com/wp-content/uploads/2021/09/858-1024x576.jpg)
លោកស្រីបន្ដថា បើគិតក្នុងឆមាសទី១ ឆ្នាំ២០២១ ធៀបទៅនឹងឆមាសទី១ ឆ្នាំ២០២០ គ្រោះថ្នាក់ចរាចរណ៍ថយចុះ ៣៥៨លើក ស្មើ២២% (១២៦១/១៦១៩លើក) ចំនួនអ្នកស្លាប់ថយចុះ ១៥២នាក់ ស្មើ១៨% (៧០៩/ ៨៦១នាក់) និងចំនួនអ្នករបួសថយចុះ ៦៥៧នាក់ ស្មើ២៧% (១៧៩២/២៤៤៩នាក់)។
នាឱកាសនោះដែរ សម្ដេច ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធាន គ.ស.ច.គ បានថ្លែងថា មានកត្តាសំខាន់ៗជាច្រើន ដែលបានជំរុញវឌ្ឍនភាព នៃការពង្រឹងសុវត្ថិភាពចរាចរណ៍ផ្លូវគោក ដូចជា៖ ការធ្វើវិសោធនកម្មច្បាប់ និងធ្វើបច្ចុប្បន្នភាពជាបន្តបន្ទាប់ នូវបទដ្ឋានគតិយុត្តពាក់ព័ន្ធ ដើម្បីពង្រឹងការអនុវត្តច្បាប់ ស្តីពីចរាចរណ៍ផ្លូវគោក, ការជំរុញដាក់ចេញវិធានការ រឹតបន្តឹងការអនុវត្តច្បាប់ ស្ដីពីចរាចរណ៍ផ្លូវគោក បានទាន់ពេលវេលា ពីសំណាក់រាជរដ្ឋាភិបាល ដែលមានគណៈកម្មាធិការជាតិ សុវត្ថិភាពចរាចរណ៍ ផ្លូវគោកជាសេនាធិការជាដើម។
![](https://dap-news.com/wp-content/uploads/2021/09/859-1024x638.jpg)
ដោយឡែក លោក តូច ចាន់កុសល រដ្ឋលេខាធិការប្រចាំការ ក្រសួងសារធារណការ បានលើកឡើងដែរថា ឆមាសទី១ ឆ្នាំ២០២១ យានដ្ឋានជួសជុល និងយានដ្ឋានកែច្នៃដំឡើងយានយន្ត គិតត្រឹមខែកក្កដា ឆ្នាំ២០២១ មានចំនួន ៤.៥៣២កន្លែង (មានច្បាប់ ៣.៩៧១កន្លែង អត់ច្បាប់ ៣៨០កន្លែង) បានបិទយានដ្ឋានសរុបចំនួន ១៨១កន្លែង៕
![](https://dap-news.com/wp-content/uploads/2020/08/1-1.png)