ព័ត៌មានជាតិ

សម្ដេច ស ខេង ៖ មេឃុំ-ស្មៀន-មេប៉ុស្តិ៍-មេភូមិ ត្រូវបម្រើពលរដ្ឋ ឲ្យបានល្អ ព្រោះសំឡេងឆ្នោត អាស្រ័យលើពួកគាត់

ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានណែនាំដល់គ្រប់ ភាគីពាក់ព័ន្ធ ត្រូវលើកទឹកចិត្ត មេឃុំ-ស្មៀន-មេប៉ុស្តិ៍-មេភូមិ ឲ្យបម្រើការងារជូនប្រជាពលរដ្ឋ ឲ្យបានល្អបំផុត ព្រមទាំងមានប្រសិទ្ធភាពខ្ពស់។

ក្នុងពិធីប្រកាសចូលកាន់មុខតំណែង អភិបាល នៃគណៈអភិបាលខេត្តបាត់ដំបងថ្មី នាថ្ងៃទី១១ ខែតុលា ឆ្នាំ២០២១ សម្ដេចក្រឡាហោម ស ខេង មានប្រសាសន៍ថា «សូមឲ្យយកចិត្តទុកដាក់ និងលើកទឹកចិត្តដល់មន្ដ្រីនៅថ្នាក់ក្រោមមាន៤ប្រភេទ រួមមាន ៖ មេឃុំ-ចៅសង្កាត់, ស្មៀនឃុំ-ស្មៀនសង្កាត់, មេប៉ូលីស និងមេភូមិ តាមការសិក្សា និងបទពិសោធន៍ សំឡេងឆ្នោត ជោគជ័យ ឬមិនជោគជ័យ ពឹងអាស្រ័យទៅលើអ្នកទាំង៤ហ្នឹង»។

សម្ដេចក្រឡាហោម បានបញ្ជាក់ថា ប្រជាពលរដ្ឋមានសំណូមពរអ្វីមួយពិត ឬមិនពិត ក្នុងឋានៈជាអាជ្ញាធរ និងមន្ដ្រី ដែលធ្វើការជូនជាតិ ជូនប្រជាពលរដ្ឋ ត្រូវប្រឡូកបញ្ហាទាំងអស់នោះ ដើម្បីយកមកដោះស្រាយជូនប្រជាពលរដ្ឋ ដោយមានប្រសិទ្ធភាពខ្ពស់ ។

ផ្ទាំងពាណិជ្ជកម្ម

សម្ដេចក្រឡាហោម បានបន្ថែមថា បើសិនដោះស្រាយនៅមូលដ្ឋានមិនបានទេ ក៏បើកឱកាសឲ្យប្រជាពលរដ្ឋបន្ដប្ដឹង ក្នុងគេទំព័រហ្វេសប៊ុករបស់ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ព្រោះ សម្ដេចតេជោ ក៏បានខិតខំដោះស្រាយ តាមការជាក់ស្ដែងផងដែរ ដូច្នេះ ត្រូវទទួលយកសំណូមពរនានា របស់ប្រជាពលរដ្ឋគ្រប់ពេលវេលា ដើម្បីស្រាយមានប្រសិទ្ធភាព ។

ជាមួយគ្នានេះ សម្ដេច ក៏បានលើកឡើងថា ហ្វេសប៊ុករបស់សម្ដេចផ្ទាល់ទទួលសំណើរ និងសំណូមពរនានារបស់ប្រជាពលរដ្ឋ ដោយទទួលបានលទ្ធផលល្អ ក្នុងការដោះស្រាយជូនប្រជាពលរដ្ឋ ដែលរហូតមកដល់ពេលនេះ ក្រុមការងារដោះស្រាយបានជាង១ពាន់ករណី ព្រមទាំងបន្ដដោះស្រាយជាបន្ដបន្ទាប់ ផងដែរ៕

To Top