ព័ត៌មានជាតិ

សមាគមអ្នកសារព័ត៌មាន កម្ពុជា-ចិន ស្នើលោក ម៉ៅ ធនិន ពិចារណាដកការរិតត្បិត លើអ្នកសារព័ត៌មាន ក្នុងខេត្តកំពត

ភ្នំពេញ ៖ លោក សយ សុភាព ប្រធានសមាគមអ្នកសារព័ត៌មាន កម្ពុជា-ចិន បានស្នើលោក ម៉ៅ ធនិន អភិបាលខេត្តកំពត ពិចារណាដកការរិតត្បិត លើអ្នកសារព័ត៌មាននៅក្នុងខេត្តកំពត។

ការស្នើសុំពីលោក សយ សុភាព ក្រោយពីលោក ម៉ៅ ធនិន បញ្ជាឱ្យប្រធានមន្ទីរព័ត៌មាន តម្រូវឱ្យអ្នកកាសែត ត្រូវសុំការអនុញ្ញាតពីអាជ្ញាធរជាមុនសិន ទើបអាចចុះយកព័ត៌មាន ក្នុងភូមិសាស្ត្រខេត្តកំពតបាន។

យោងតាមលិខិតចំហររបស់ សមាគមអ្នកសារព័ត៌មាន នាថ្ងៃទី១៩ ខែវិច្ឆិកា ឆ្នាំ២០២១ លោក សយ សុភាព បានបញ្ជាក់ថា «លោក ម៉ៅ ធនិន អភិបាលខេត្តកំពត ជាស្រលាញ់ និងគោរពរាប់អាន! ខ្ញុំ ពិតជាទទួលស្គាល់ និងគោរព នូវ សកម្មភាពរបស់លោកចំពោះ បុព្វហេតុ ដ៏ត្រឹមត្រូវ បំរើ ប្រជារាស្ត្រ។ ខ្ញុំ ក្នុង នាមជាប្រធានសមាគម អ្នកសារព័ត៌មាន កម្ពុជា-ចិន ខ្ញុំស្នើសុំលោក អភិបាល ពិចារណា ដកការរិតត្បិត លើ អ្នកសារព័ត៌មាននៅ ក្នុងខេត្ត កំពត របស់លោក តាម ការគួរ»។

សូមបញ្ជាក់ថា ក្នុងពិធីបើកសិក្ខាសាលា ស្តីពី ការអនុវត្តវិជ្ជាជីវៈ និងសេរីភាពសារព័ត៌មាន ក្នុងក្របខ័ណ្ឌច្បាប់ នៃព្រះរាជាណាចក្រកម្ពុជា កាលពីថ្ងៃទី១៦ វិច្ឆិកា លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានឆ្លើយទៅលោក ម៉ៅ ធនិន ថា អ្នកសារព័ត៌មានមានសិទ្ធិពេញលេញ ក្នុងការចុះយកព័ត៌មានទូទាំងប្រទេស ដោយពុំចាំបាច់ជូនដំណឹង ឬសុំការអនុញ្ញាត ពីអាជ្ញាធរឡើយ។

លោក ខៀវ កាញារីទ្ធ បានថ្លែងថា «អភិបាលខេត្តមួយ (លោកម៉ៅ ធនិន) អ្នកកាសែតទៅណាត្រូវរាយការណ៍ ត្រូវជូនដំណឹងទៅអាជ្ញាធរ មិនមែនអ៊ីចឹងទេ។ មាត្រា ៤០ បាននិយាយពីសិទ្ធិដើរហើរបស់ពលរដ្ឋ គេទៅណាគេមានសិទ្ធិរបស់គេ គេមិនបាច់ជូនដំណឹងយើងទេ»៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×