ព័ត៌មានជាតិ

នាយករដ្ឋមន្ត្រីថា កំណើនសេដ្ឋកិច្ចកម្ពុជា កំពុងងើបឡើងវិញ ខណៈឆ្នាំ២០២១ អាចកើន ៣% (Video)

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានលើកឡើងថា កំណើនសេដ្ឋកិច្ចកម្ពុជា កំពុងតែមានសន្ទុះងើបឡើងវិញ ខណៈសម្ដេច បានដាក់ការសន្និដ្ឋានថា កំណើនសេដ្ឋកិច្ចអាចមានកំណើនក្នុងរង្វង់ជុំវិញ ៣% ។

ក្នុងឱកាសអញ្ជើញសម្ពោធដាក់ឲ្យ ប្រើប្រាស់ជាផ្លូវការ សណ្ឋាគារ «ហាយ៉ាត់ រីជិនស៊ី ភ្នំពេញ» នាថ្ងៃទី១៥ ធ្នូនេះ សម្ដេចតេជោ បានមានប្រសាសន៍ថា ពេលដែលចាប់ផ្ដើម បើកប្រទេសឡើងវិញ សង្កេតឃើញ ការកើនឡើងនូវប្រាក់ចំណូល ដែលធ្លាក់ចុះក្នុងរយៈពេលប៉ុន្មានខែនោះ ឥឡូវងើបឡើងវិញ ទោះបីមិនទាន់ងើបស្មើ នឹងមុនសម័យកូវីដដែលរកបានប្រមាណ ៥០០ទៅ៧០០លានដុល្លារ ក្នុងមួយខែ តែឥឡូវនេះក៏បានងើបឡើងវិញ ពេលដែលមានតម្រូវការក្នុងស្រុក ការនាំចូលក៏ចាប់ផ្ដើមកើនឡើង ពន្ធគយក៏ចាប់ផ្ដើមមានកំនើន ។

សម្ដេចតេជោបញ្ជាក់ថា «តាមការសន្និដ្ឋានរបស់ខ្ញុំ សេដ្ឋកិច្ចឆ្នាំ២០២១នេះ នៅជុំវិញ ៣% ពិតមែនតែយើងដាក់ក្នុងច្បាប់ថវិកាថា កំណើនត្រឹមតែ ២,៤%ទេ ក៏ប៉ុន្តែអង្គការមួយ បានវាយតម្លៃរួចជាស្រេចថា ពីខែតុលា យើងមានកំណើន ២,៨% ប៉ុន្តែខ្ញុំគិតថា កំណើនសេដ្ឋកិច្ចរបស់យើង អាចនៅក្នុងរង្វង់ជុំវិញ ៣%» ។

ផ្ទាំងពាណិជ្ជកម្ម

សម្ដេចបន្ថែមថា ព្រោះផលប៉ះពាល់ពិតប្រាកដ គឺបញ្ហាសេវាទេសចរ ប៉ះពាល់ធ្ងន់ធ្ងរជាងគេ សេវាដទៃទៀតមិនធ្ងន់ធ្ងរទេ ប៉ុន្តែវិស័យឧស្សាហកម្ម និងកសិកម្ម គឺពុំមានផលប៉ះពាល់ទេ ។ ឥឡូវដំណាក់កាលចុងក្រោយនេះ ដែលរោងចក្រមួយចំនួន ត្រូវបង្កើនការធ្វើការងារពេលយប់ ទើបផ្គត់ផ្គង់ដល់ការបញ្ជាទិញពីខាងក្រៅបានទាន់ពេល ។

សម្ដេចតេជោ ក៏បានអំពាវនាវឲ្យជនរួមជាតិទាំងអស់ ត្រូវរួមសាមគ្គីគ្នា ជម្នះនូវការលំបាកនេះបន្តទៀត ដើម្បីកុំឲ្យកូវីដ វាយលុកកម្ពុជាសារជាថ្មី ៕

To Top
×