នយោបាយ

លោក សេង សារី ៖ លោក កឹម សុខា មាន៣ជម្រើស ក្រោយទទួលបានសេរីភាព និងនីតិសម្បទាននយោបាយឡើងវិញ (Video)

ភ្នំពេញ ៖ លោកបណ្ឌិត សេង សារី អ្នកស្រាវជ្រាវសង្គម បានវិភាគពីលោក កឹម សុខា ថា អតីតមេបក្សប្រឆាំងនេះ មាន៣ជម្រើស សម្រាប់ជីវិត នយោបាយ ក្រោយពីមានសិទ្ធិសេរីភាព និងបាននីតិសម្បទានយោបាយឡើងវិញ ។ ការវិភាគរបស់លោកនេះ ដោយសារតែ លោកមើលឃើញ លទ្ធភាព នៃការ រស់ឡើងវិញ របស់សង្គ្រោះជាតិមានភាគរយតិចតួច ខណៈ លោក កឹម សុខា នឹងបន្តឡើងសវនាការ នៅថ្ងៃទី១៩ ខែមករា ឆ្នាំ២០២២ខាងមុខនេះ ។

ជម្រើសទាំង៣ដែលលោក សេង សារីវិភាគនោះរួមមាន ៖ ជម្រើសទី ១. បន្តតស៊ូជាមួយលោក សម រង្សី ដើម្បីស្វែងរកយុត្តិធម៌ ឲ្យអតីតគណបក្សសង្រ្គោះជាតិ និងម្ចាស់ឆ្នោតជាង ៣លាននាក់ ដោយរក្សាស្មារតី សម រង្ស៊ី-កឹម សុខា ជាមនុស្សតែមួយដដែល ហើយលោក កឹម សុខា អាចដំណើរការគណបក្សសិទ្ធិមនុស្សឡើងវិញ ដោយប្រគល់ឲ្យកូនស្រីច្បង របស់ខ្លួនក្នុងការដឹកនាំបន្ត។

ផ្ទាំងពាណិជ្ជកម្ម

ជម្រើសទី ២. ក្លាយជាមេដឹកនាំសម្ព័ន្ធ នៃគណបក្សតូចៗ ហើយចូលរួមការបោះឆ្នោតឆ្នាំ២០២២ និង២០២៣ លទ្ធផលអាចបានការគាំទ្រខ្លះ ហើយនឹងអាចក្លាយជាដៃគូរគណបក្សប្រជាជនក្នុងការបង្កើតរដ្ឋាភិបាលថ្មី ដោយអាចទទួលបានសម្បទានតួនាទីក្នុងរដ្ឋាភិបាលខ្លះដែរ។ តែលោក កឹម សុខា ត្រូវសម្អាតអ្នកនយោបាយត្រីក្រឹមមួយចំនួន នៅជុំវិញខ្លួនជាមុនសិន ព្រោះគេនឹងបន្តចឹកបំបែកសម្ព័ន្ធនៃគណបក្សតូចៗនោះទៀតជាមិនខាន។

ជម្រើសទី ៣. ព្យាយាមបន្ថែមទៀតក្នុងការបន្តធាក់លោក សម រង្ស៊ី ចេញពីសង្គ្រោះជាតិ ដើម្បីបានសង្គ្រោះជាតិតែម្នាក់ឯង ហើយលោក កឹម សុខា នឹងក្លាយជាអ្នកនយោបាយមេម៉ាយស្តុក គ្រប់គ្រងសំបកសង្គ្រោះជាតិយ៉ាងពេញមុខពេញមាត់៕

To Top