ព័ត៌មានជាតិ

ប្រធានគណៈបក្សប្រជាជន ខេត្តកំពង់ចាម ជម្រុញមន្ត្រីឲ្យខិតខំបម្រើសេវា ដោយស្មោះត្រង់ និងឆាប់រហ័សជូនដល់ពលរដ្ឋ

កំពង់ចាម ៖ ប្រធានគណៈបក្សប្រជាជនកម្ពុជា ខេត្តកំពង់ចាម លោក អ៊ុន ចាន់ដា បានជម្រុញមន្ត្រីមូលដ្ឋាន ខិតខំបម្រើសេវា ដោយស្មោះត្រង់ និងឆាប់រហ័ស ជូនដល់ពលរដ្ឋ ។

លោក អ៊ុន ចាន់ដា បានលើកឡើងដូច្នេះ នៅថ្ងៃទី២៤ ខែមេសា ឆ្នាំ ២០២២ ក្នុងពិធីសំណេះសំណាលជាមួយបេក្ខជនឈរឈ្មោះ បោះឆ្នោតក្រុមប្រឹក្សាឃុំ សង្កាត់ អាណត្ដិទី ៥ ឆ្នាំ ២០២២ នៅស្នាក់ការគណបក្សប្រជាជនស្រុកស្ទឹងត្រង់ ។លោកប្រធានគណៈកម្មាធិការ បក្សប្រជាជនខេត្តកំពង់ចាម បានថ្លែងថា មន្ត្រីអាជ្ញាធរមូលដ្ឋាន ដែលជាសមាជិកសមាជិកា គណបក្សប្រជាជនកម្ពុជា ត្រូវមានស្មារតី សាងអំពើល្អជាមួយប្រជាពលរដ្ឋ ជាពិសេសការបម្រើសេវា ជូនពួកគាត់ដោយស្មោះត្រង់ និងឆាប់រហ័ស ប្រកបដោយប្រសិទ្ធភាព ពោលគឺ ជានិច្ចជាកាលត្រូវធ្វើអំពើល្អ និងផ្ដល់ភាពកក់ក្តៅជូនប្រជាពលរដ្ឋ ។

លោក អ៊ុន ចាន់ដា បានមានប្រសាសន៍បន្តថា ចំពោះមន្ត្រីប៉ុស្តិ៍រដ្ឋបាល ត្រូវអនុវត្តគោលនយោបាយ ភូមិឃុំមានសុវត្ថភាពអោយបានល្អ ខិតខំថែរក្សាសន្តិសុខ ត្រូវ ការពារជៀសវាងការលេងល្បែងស៊ីសងគ្រប់ប្រភេទក្នុងមូលដ្ឋាន ដែលជាហេតុនាំឲ្យកើតមានអំពើចោរកម្ម នឹងខិតខំបង្ក្រាបបទល្មើសគ្រឿងញៀនជាដើម ។

ជាងនេះទៅទៀតក្នុងអង្គភាពនីមួយៗ ចាំបាច់ត្រូវ រក្សាសាមគ្គីភាព ឯកភាពផ្ទៃក្នុងអោយបានល្អ ដើម្បីឈានទៅអនុវត្តន៍ការងារ សម្រេចបានជោគជ័យលើភារកិច្ចរបស់ខ្លួន ៕

To Top