ភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានលើកឡើងថា អតីតគណបក្ស សង្រ្គោះជាតិ ដែលមានរូបសញ្ញាព្រះអាទិត្យ កាលពីនៅមានដង្ហើម នៅតែប្រកួតប្រជែង ការបោះឆ្នោតចាញ់ គណបក្សប្រជាជនកម្ពុជាដែលមានរូបសញ្ញាទេវតា ចុះទម្រាំគណបក្សភ្លើងទៀនដែល គ្រាន់តែជាកម្ទេច ភ្លើងតូចមួយ មានសមត្ថភាពអ្វីមកប្រកួតឈ្នះ បក្សប្រជាជនកម្ពុជាបាននោះ។ នេះជាការលើកឡើងរបស់លោក សុខ ឥសាន ក្នុងបណ្តាញតេឡេក្រាម នាថ្ងៃ២៤ ឧសភា ។
ការលើកឡើងរបស់លោក សុខ ឥសាននេះ បន្ទាប់ពីលោក សុន ឆ័យ អនុប្រធានគណបក្សភ្លើងទៀន បានបង្ហាញពីមោទកភាពទុកជាមុន ក្នុងអំឡុងពេលឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់នេះថា គណបក្សខ្លួននឹងទទួលបាន សំឡេងគាំទ្រច្រើនក្នុងការបោះឆ្នោតលើកនេះ ដោយសារតែមានអ្នកគាំទ្រ ច្រើននៅទូទាំងប្រទេស។
អ្នកនាំពាក្យបក្សកាន់អំណាចបន្តថា ឲ្យតែពួកប្រឆាំង ទោះចេញមកម៉ាកណាមក ក៏នៅតែបរាជ័យដដែល គ្មានថ្ងៃឈ្នះទេ។
ក្នុងខណៈកំពុងដំណើរការឃោសនាបោះឆ្នោតឃុំ-សង្កាត់ មកដល់ថ្ងៃទី៤នេះ លោក សុខ ឥសាន លើកឡើង ទៀតថា ការចូលរួមប្រកួតប្រជែងការបោះឆ្នោតរបស់គណបក្សជាច្រើន (បក្ស១៧ប្រកួត យកសន្លឹកឆ្នោត) ជាការបញ្ជាក់ថា តួនាទីគួរជាទីទុកចិត្តរបស់គណៈកម្មាធិការជាតិរៀបចំការបោះឆ្នោត (គ.ជ.ប) ត្រូវបានទទួលស្គាល់ ៕
