ភ្នំពេញ: តុលាការកំពូល កាលពីព្រឹកថ្ងៃទី ៦ខែ មិថុនា ឆ្នាំ ២០២២នេះ បានប្រកាសសាលដីកា និង តម្កល់ទោស ពិរុទ្ធជនគ្រឿងញៀន ជនជាតិជប៉ុនម្នាក់ ជាប់ពន្ធនាគារ កំណត់ ២៥ឆ្នាំ ជាប់ពាក់ព័ន្ធនឹងការជួញដូរ និង ដឹកជញ្ជូន ជួញដូរគ្រឿងញៀនចំនួន ជិត២ គីឡូក្រាម ពីប្រទេសកម្ពុជា ទៅ ប្រទេសជប៉ុន ប្រព្រឹត្ត នៅក្នុងចំណុច អាកាសយានដ្ឋានអន្តរជាតិភ្នំពេញ កាលពីឆ្នាំ ២០២០ ។
លោក ឃឹម ប៉ុណ្ណ ជាប្រធានចៅក្រមប្រឹក្សាជំនុំជម្រះ នៃ តុលាការកំពូល បានថ្លែងអោយដឹងថា ទណ្ឌិតរូបនេះ មានឈ្មោះ NONAKA SHUNICHI ភេទប្រុស អាយុ៧២ឆ្នាំ ជាជនជាតិជប៉ុន និង ត្រូវបានសាលាដំបូងរាជធានីភ្នំពេញ កាលពីថ្ងៃទី ១៥ ខែ កញ្ញា ឆ្នាំ ២០២០ ផ្តន្ទាទោស ដាក់ពន្ធនាគារកំណត់ ២៥ ឆ្នាំ ក្រោមការចោទប្រកាន់ពីបទ : ដឹកជញ្ជូន និង ជួញដូរដោយខុសច្បាប់ នូវសារធាតុញៀន តាមមាត្រា ៤០ នៃច្បាប់ ស្តីពីការត្រួតពិនិត្យគ្រឿងញៀន។
ទណ្ឌិត ឈ្មោះ NONAKA SHUNICHI ត្រូវបានចាប់ឃាត់ខ្លួន កាលពី ថ្ងៃទី១៥ ខែកុម្ភៈ ឆ្នាំ២០២០ នៅរាជធានីភ្នំពេញ ។
ក្រោយឃាត់ខ្លួន, សមត្ថកិច្ចនគរបាលប្រឆាំងបទល្មើសគ្រឿងញៀន ក្រសួងមហាផ្ទៃ ដកហូតបាន
គ្រឿងញៀនប្រភេទមេតំហ្វេតាមីន ទម្ងន់ ១,៧គីឡូក្រាម៕
ដោយ: លីហ្សា
