ព័ត៌មានជាតិ

ការកើនឡើងភាពតានតឹងរវាងអ៊ីរ៉ង់ និង IAEA បានដាក់ស្រមោលលើការបន្ត កិច្ចចរចានុយក្លេអ៊ែរ នៅទីក្រុងវីយែន

តេអេរ៉ង់៖ អ្នកជំនាញបានឲ្យដឹងថា ភាពតានតឹងដែលកំពុងកើនឡើងរវាងអ៊ីរ៉ង់ និងទីភ្នាក់ងារថាមពលបរមាណូអន្តរជាតិ (IAEA) បានកាត់បន្ថយឱកាសនៃ ការបន្តកិច្ចចរចានៅទីក្រុងវីយែន ស្តីពីការស្ដារឡើងវិញនូវកិច្ចព្រមព្រៀង នុយក្លេអ៊ែរអ៊ីរ៉ង់ក្នុងពេលឆាប់ៗនេះ។

ថ្មីៗនេះ អ៊ីរ៉ង់បានដកកាមេរ៉ាត្រួតពិនិត្យ មួយចំនួនដែលបានដំឡើងដោយ IAEA នៅរោងចក្រនុយក្លេអ៊ែររបស់ខ្លួន ក្រោមកិច្ចព្រមព្រៀងនុយក្លេអ៊ែរ ឆ្នាំ២០១៥ ដែលត្រូវបានគេស្គាល់ជាផ្លូវការថា ជាផែនការសកម្មភាពទូលំទូលាយរួម (JCPOA) ដែលអតីតរដ្ឋបាលរបស់សហរដ្ឋអាមេរិក ក្រោមការដឹកនាំរបស់លោក ដូណាល់ ត្រាំ បានដកខ្លួនក្នុងឆ្នាំ២០១៨ ។

វិធានការរបស់ទីក្រុងតេអេរ៉ង់ គឺដើម្បីឆ្លើយតបទៅនឹងការអនុម័តរបស់ IAEA នូវដំណោះស្រាយ ដែលព្រាងដោយសហរដ្ឋអាមេរិក និងសហភាពអឺរ៉ុប នៃប្រទេសបារាំង អង់គ្លេស និងអាល្លឺម៉ង់ ដែលបានរិះគន់អ៊ីរ៉ង់ ចំពោះអ្វីដែលពួកគេហៅថា “បរាជ័យ” ក្នុងការឆ្លើយតបទៅនឹងសំណួររបស់ IAEA ទាក់ទងនឹងនុយក្លេអ៊ែរ។

លោក Rafael Grossi អគ្គនាយក IAEA បានប្រាប់កិច្ចប្រជុំក្រុមប្រឹក្សាភិបាលរបស់ IAEA កាលពីសប្តាហ៍មុនថា “ខ្ញុំគិតថា នេះនឹងក្លាយជាការវាយប្រហារដ៏ធ្ងន់ធ្ងរ” ចំពោះកិច្ចចរចានៅទីក្រុងវីយែន រវាងអ៊ីរ៉ង់ និងមហាអំណាចលើការស្ដារឡើងវិញ នូវកិច្ចព្រមព្រៀងនុយក្លេអ៊ែរឆ្នាំ២០១៥ ។

ផ្ទាំងពាណិជ្ជកម្ម

លោក Reza Nasri អ្នកជំនាញអ៊ីរ៉ង់ផ្នែកទំនាក់ទំនង អន្តរជាតិបានប្រាប់កាសែត Ebtekar របស់អ៊ីរ៉ង់កាលពីថ្ងៃអាទិត្យថា ដំណោះស្រាយរបស់ IAEA គឺជា “ការអភិវឌ្ឍន៍អវិជ្ជមាន នៅក្នុងដំណើរការការទូត” ។

លោក Nasri បានបន្ថែមថា អ្វីដែលនឹងកើតឡើង ចំពោះបញ្ហានុយក្លេអ៊ែរអ៊ីរ៉ង់ ចាប់ពីពេលនេះទៅ មួយផ្នែកលើប្រតិកម្មរបស់អ៊ីរ៉ង់ ចំពោះដំណោះស្រាយ និងប្រតិកម្មរបស់ភាគីម្ខាងទៀត ចំពោះជំហានរបស់អ៊ីរ៉ង់៕

ប្រែសម្រួល ឈូក បូរ៉ា

To Top