ភ្នំពេញ ៖ សម្តេចតេជោ ហ៊ុន សែន នាយរដ្ឋមន្ត្រីកម្ពុជា បានសម្តែង ការហួសចិត្ត និងស្នើដល់ម្ចាស់គណនី ជាស្ត្រីបញ្ឈប់ការប្រើប្រាស់ ពាក្យពេចន៍ អាសអាភាសខ្លាំង នៅលើបណ្ដាញសង្គម TikTok ។
លើកឡើងបែបនេះ ក្រោយពីសម្ដេចតេជោ បានសង្កេតឃើញថា ការប្រើប្រាស់បណ្តាញសង្គមតិកតុកខ្មែរ (TikTok) មិនត្រឹមត្រូវ ដោយការប្រើប្រាស់ពាក្យចំអាសច្រើនហួសហេតុពេក ជាពិសេស ស្រ្តីខ្មែរតែម្តង ។
ក្នុងពិធីសំណេះសំណាល ជាមួយគណៈប្រតិភូកីឡា អាស៊ានប៉ារ៉ាហ្គេម (ASEAN Para Games) នាព្រឹកថ្ងៃទី៦ ខែកក្កដា ឆ្នាំ២០២២ សម្តេចតេជោបានមានប្រសាសន៍ថា ស្ត្រីខ្មែរមួយចំនួន ដូចជាអាសអាភាសពេកទេដឹង? ខ្លះចេញមកចំអេះចំអាសតែម្តង នៅលើបណ្ដាញ TikTok។
សម្តេចតេជោបញ្ជាក់ថា «អង្វរកចំពោះនាងៗ ក្មួយៗ ដូចខ្លះ និយាយត្រង់ៗទៅចំ ចំណុចហ្នឹងតែម្តង» ដូច្នេះ សម្តេចអង្វរក និងសុំបញ្ឈប់ការប្រើប្រាស់ ពាក្យចំអេះចំអាសចំៗពេក ។ តែយ៉ាងណាមិញ សម្តេចបញ្ជាក់ថា «យើងគ្មានផែនការបិទតិកតុកទេ លេងចុះ តែវាមិនមែនជាមធ្យោបាយ សម្រាប់យកមកនិយាយចំអាសចំអូងទេ»។
លើសពីនេះ សម្តេចតេជោបន្ថែមទៀតថា អ្នកខ្លះចេញមកប្រើប្រាស់ពាក្យថា «គ្មានអីស្រួលជាង» រួចសម្តេច ក៏បន្តថា សម្តេចសុំនិយាយ ប៉ុណ្ណឹងមិនបាច់ពោលដល់ឃ្លាខាងចុងបន្តទេ គឺគេដឹងហើយថា វាយ៉ាងម៉េចនោះ៕
