ភ្នំពេញ: តុលាការកំពូល កាលពីព្រឹក ថ្ងៃទី២២ ខែកក្កដា ឆ្នាំ ២០២២នេះ បានប្រកាសសាលដីកា លើបណ្តឹងសារទុក្ខ ស្នើសុំស្ថិតនៅក្រៅ ឃុំបណ្តោះអាសន្ន របស់អតីតមេបញ្ជាការ កងរាជអាវុធហត្ថក្រុងក្រចេះម្នាក់ ដែលចាប់ឃាត់ និង ឃុំខ្លួន ជាបណ្ដោះអាសន្ន នៅក្នុងពន្ធនាគារ នៅខេត្តក្រចេះ ជាប់ពាក់ព័ន្ធនឹងបទល្មើស ការធ្វើទារុណកម្ម-អំពើឃោរឃៅ មានស្ថានទម្ងន់ទោស ទាក់ទងនឹងជនរងគ្រោះ- ហិង្សា ដោយចេតនា មានស្ថានទម្ងន់ទោស ទាក់ទងនឹងជនរងគ្រោះ និង ការគំរាមកំហែងថា នឹងសម្លាប់- ដោយមានការចោទប្រកាន់ថា គាត់បានវាយធ្វើទារុណកម្ម ក្មេងស្រីចំនួន២នាក់ ដែលខ្ញុំបម្រើ និង បានបង្ខំឱ្យជនរងគ្រោះ សំពះខ្មោចឆ្កែរបស់ជនជាប់ចោទ និង ឱ្យស៊ីអាចម៍ឆ្កែ ដោយសារតែ ជនរងគ្រោះបាន ធ្វើឲ្យសត្វទំនើង មួយក្បាល របស់ជនជាប់ចោទងាប់ ប្រព្រឹត្តនៅ ហាងយីហោ លាង ហ៊ុយ លក់រថយន្ត ម៉ូតូ និងទូរស័ព្ទដៃទំនើប នៅ ភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ និងនៅចំណុចភូមិរកាកណ្ដាល១ សង្កាត់រកាកណ្ដាល ក្រុងក្រចេះ ខេត្តក្រចេះ កាលកាលពី អំឡុងឆ្នាំ២០២១ ។
លោក និល ណុន ជាប្រធានចៅក្រមប្រឹក្សា ជំនុំជម្រះនៃ តុលាការកំពូល បានសម្រេចដោះលែងលែង ជនជាប់ចោទ ឈ្មោះ ទេព ហ៊ុយ ភេទប្រុស អាយុ ៤២ឆ្នាំ (ជាអតីត មេបញ្ជាការកងរាជអាវុធហត្ថក្រុងក្រចេះ) បានស្ថិតនៅក្រៅឃុំ ជាបណ្តោះអាសន្ន តាមការស្នើសុំរបស់គាត់ តែត្រូវដាក់ឱ្យស្ថិត នៅក្រោមការពិនិត្យរបស់តុលាការ ។
យោងតាមដីកាតុលាការ បានឱ្យដឹងថា នៅក្នុងសំណុំរឿងក្តីនេះ ជនជាប់ចោទ ឈ្មោះ ទេព ហ៊ុយ ត្រូវបាន សាលាដំបូង ខេត្តក្រចេះ កាលពីថ្ងៃ ទី ១ ខែ វិច្ឆិកា ឆ្នាំ ២០២១ បានចាប់ខ្លួន និង បង្គាប់ឲ្យឃុំខ្លួនបណ្ដោះអាសន្ន នៅក្នុងពន្ធនាគារពីបទ ” ទារុណកម្ម និងអំពើឃោរឃៅ មានស្ថាន ទម្ងន់ទោសទាក់ទងនឹងជនរងគ្រោះ, ហិង្សាដោយចេតនាមានស្ថានទម្ងន់ទោស ទាក់ទងនឹងជនរងគ្រោះ, គំរាមកំហែងថានឹងសម្លាប់ តាមបញ្ញាត្តិមាត្រា ២១១, ២១៩, ៣៣ នៃក្រមព្រហ្មទណ្ឌ នៃព្រះរាជាណាចក្រកម្ពុជា ។
ជនជាប់ចោទ ឈ្មោះ ទេព ហ៊ុយ ត្រូវបានចាប់ឃាត់ខ្លួន កាលពីថ្ងៃទី៣០ ខែ តុលា ឆ្នាំ ២០២១ បន្ទាប់ពីជាប់សង្ស័យ បានវាយ ធ្វើទារុណកម្ម ទៅលើ ក្មេងស្រីរងគ្រោះទាំង ២នាក់មានឈ្មោះ ត្រែក ធារ៉ា អាយុ១២ឆ្នាំ និងម្នាក់ទៀត ឈ្មោះ វ៉ន ពិសី អាយុ១២ឆ្នាំ។
អ្នកទាំង២នាក់ ត្រូវជាបងប្អូនជីដូនមួយនឹងគ្នា និង ជាអ្នកបម្រើអោយក្រុមគ្រួសាររបស់ជនជាប់ចោទ មានទីលំនៅ ភូមិកញ្ជរ ឃុំកញ្ជរ ស្រុកឆ្លូង ខេត្តក្រចេះ៕
ដោយ: លីហ្សា
